Танымал тележүргізуші Гүлназ Ауданбаева Дженнифер Лопестің Қазақстанға келу себебін айтты.
Гүлназ Ауданбаева кейінгі күндері қоғамда қызу талқыланып жатқан тақырыпқа қатысты өз ойымен әлеуметтік желідегі парақшасында бөлісті, деп хабарлайды Caravan.kz медиа порталы.
Оның айтуынша, әлемдік жұлдыздардың Орта Азия елдерінде концерт беруінің астарында саясат жатқан көрінеді.
”Күні кеше Джей Ло келді, енді Шакира келеді дегенді айтып жатыр. Келсін, ақшасы бар адамдар көрсін. Онда тұрған ештеңе жоқ. Бірақ, мен стандарттан тыс ойланатын адаммын. Бұның бәрі тектен тек емес деп ойлаймын. Сіздер мәдениет министрі шақырып, содан келіп жатыр деп ойлайтын шығарсыздар. Жоқ, мен олай ойламаймын. Аяқ астынан мега жұлдыздардың тек Қазақстан емес, Орта Азияға келуі тек министрлік шақырғаннан деп ойламаймын. Оған дейін қайда болды? Менің ойымша, мұның астарында үлкен дүние жатыр. Бұл кісілер бар дегесін барады, әрине, ақша табады. Бірақ, мынандай елге мегажұлдыздарды жіберетін кімдер? 2020 жылы пандемия кезінде бір әңгіме естігенмін, қазір сонымен байланыстырып тұрмын. Пандемияның себебіне қатысты қолдан жасалған деген секілді түрлі әңгіме айтылды ғой. Мен оған сенемін. Сол кезде айтылған тағы бір себебі, бүкіл ұшақ рейстерін тоқтатып тастаған кезде штаб пәтерлер біртіндеп Орта Азияны зерттеуге көшіп, тіпті келіп жатыр деген. Орта Азияға әлемнің нөмірі бірінші байларының көзі түсіп, олар осы жаққа ауысайын деп жатыр деген еді. Неге? Себебі, климат, АҚШ, Еуропа суға кетуі мүмкін дегенді естіп жатырмыз ғой. Түбі осыда деп ойлаймын. Өйткені, Орталық Азия, әсіресе Қазақстан бүкіл әлемді су басып кетіп жатса, географиялық жағынан су тасқынына төтеп бере алатын жағдайда. 2020 жылы естіген әңгіме Джей Ло келгенде есіме түсіп кетті. Сол адамдардың Орталық Азияға көзі түсіп, әлемде осындай ел бар деген назар аудару компаниясы деп ойлаймын. Ақшам, мүмкіндігім, уақыт болса мен Шакираға барамын. Онда тұрған ештеңе жоқ. Қатты фанаты емеспін, фанат болсам, барар едім. Супер фанат болмаған соң бармаймын. Тереңірек ойланған уақыттағы қалқып шыққан ойымды айтып беріп жатырмын. Бұл рас дүние. Өйткені, қазір әлемнің нөмірі бірінші байлары Қазақстаннан, Орталық Азиядан жер алып жатыр дегенді естідім. Ертең аштық, су тапшылығы болады, мұздықтар еріп, су басады деп жатыр”, — дейді ол.
Тележүргізушінің бұл мәлімдемесіне желі қолданушылары түрлі пікір жазуда.
”Әрине, астарында бір саясат жатыр. Әлем құбылып тұр. Тек өзіміздің болмысымыздан айырылмасақ болғаны”, “Сөзіңіздің жаны бар”, “Бәсе бұлар аяқ асты неге бірінен соң бірі концерттік бағдарламамен келіп қалды деп ойлап жүр едім”, “Олар бұрын Ресейге келетін. Қазір ол жақ жабық. Концертті Астанаға жасайды, орыстар өздері келеді. Болды. Астарынан ештеңе іздемеңдер, бос сөз. Бұл шоу бизнес”, — деп жазды олар.
