Жақсылық Үшкемпіров атындағы Жекпе-жек сарайында «ITTF World Para Challenger Astana 2025» турнирі өтті. Бұл әлемдік пара үстел теннисі рейтингіндегі маңызды, халықаралық дода саналады.
Халықаралық үстел теннисі федерациясының (ITTF) күнтізбесіндегі сайыс 2028 жылы Лос-Анджелесте өтетін Паралимпия ойындары мен әлем чемпионатына ізашар турнир болды. Елорда төрін дүбірге бөлеген сайыста еліміздің пара теннисшілерінен бөлек, Малайзия, Үндістан, Франция, Гонконг, Бельгия, Жапония, Оңтүстік Корея, Польша, Германия, Болгария, Ұлыбритания, Түркия сынды 15 елден келген 138 спортшы бақ сынады. Олар жеке, жұптық сында тартысқа түсіп, жүлделерді бөлісті.
Жанкүйерлер үмітін арқалап шыққан 39 спортшымыз 15 жүлде олжалады. 5 күнге ұласқан турнирде саңлақтарымыз 1 күміс, 4 қола, жұптық, аралас жұптық сайыстан 2 алтын, 4 күміс, 4 қола медаль иеленді. Қазақ спортының тарихындағы алғашқы алтын медальды ерлердің жұптық бәсекесінде Париж Олимпиадасына қатысушы Әли Мақұлбеков бейтарап спортшы Тимур Хуснуллинмен (MD14 санаты) бірге алды. Сондай-ақ XD4 санатында аралас жұптық сайыста Алена Кутативна бейтарап спортшы Дмитрий Лавровпен күш біріктіріп, халықаралық доданың чемпионы атанды.
Бір спортшы бірнеше сайыс түрінде жүлдеге таласқандықтан, бірнеше медаль олжалаған отандастарымыз мерейімізді тасытты. Ел құрамасындағы ең қарт ойыншы 79 жастағы Галия Беспалая жеке сында да, әрі аралас жұптық сайыста да күміс медальды иеленді. Бұдан бөлек, Әли Мақұлбеков (1 алтын, 1 қола), Алтынай Ержанқызы (2 күміс, 1 қола), Марат Сұртыбаев (1 күміс, 1 қола) шеберлігімен дараланды. Аружан Гиниятова, Ержан Жақанов, Асхат Тажмиев, Айгүл Насихатова, Маханбет Насихан, Раушан Орынбаева, Мәди Омақов алғаш рет «ITTF World Para Challenger» додасының медалін еншіледі.
Параүстел теннисінен «ITTF World Para Challenger» турнирі бұрынырақта Польша, Бразилия, Черногория, Словения, Қытай елдерінде өтті. Халықаралық параүстел теннисі федерациясының басшылығы елорда төріндегі тартыс жоғары деңгейде ұйымдастырылғанына алғысын білдірді. Енді турнир жыл аяғына дейін БАӘ мен Мысырда өтеді.
