Денсаулық сақтау министрі Ақмарал Әлназарова Үкімет отырысында Қазақстанда ана өлімін азайту үшін контрацептивтерді сатып алуға бюджеттен қаржы бөлу қажет екенін мәлімдеді , деп хабарлайды Skifnews.kz ақпарат порталы.
Министрдің айтуынша, қабылданып жатқан шараларға қарамастан, еліміздің алты өңірінде ана өлімінің артуы байқалған. Бұл мәселеде ең күрделі жағдай Ақмола облысында тіркелген. Ондағы көрсеткіш республикалық деңгейден жеті есе жоғары. Ана өлімінің себептері ретінде ауыр экстрагениталды аурулар – 55%, ал акушерлік себептер – 45% екенін атап өтті.
Осы тәуекелдердің алдын алу үшін Ақмарал Әлназарова бірқатар нақты шараларды ұсынды. Атап айтқанда, ол өңір әкімдіктеріне медицина қызметкерлерін тартуға, олардың біліктілігін үнемі жетілдіруге және медициналық мекемелердің материалдық-техникалық базасын күшейтуге қаржы қарастыруды сұрады. Сонымен қатар, министр жергілікті атқарушы органдардан жүкті әйелдер мен балаларды облыстық орталықтарға жеткізуге көлікпен қамтамасыз ету үшін, сондай-ақ бала туу жасындағы әлеуметтік осал әйелдерді контрацептивтік құралдармен қамтуға қаржы бөлуді ұсынды.
