Тауға шығуды жақсы көретін барша саяхатшылар үшін GPS бағыттаушы қосымшасы іске қосылады. Қауіпсіздік нұсқаулары мен туристік бағыттардың электрондық базасын қамтитын цифрлық жүйені BI Group компаниясы жасамақ. Туристерге арналған жаңа сандық жүйе Іле-Алатауы ұлттық паркі ұйымдастырған пресс тур барысында БАҚ өкілдеріне таныстырылды.

– «Біз үшін туристердің қауіпсіздігі басты орында. Осы орайда біз туристерге арналған бағыттаушы қосымшасын, қауіпсіздік нұсқауларын қамтитын цифрлық жүйе жасауды қолға алып отырмыз. Оған түрлі маршруттар бойынша GPS-тректермен онлайн карталар, жоспарланған бағыт бойынша саяхатшыларды тіркеу жүйесі, тау жолы бағыттары, маршруттар туралы мәліметтер, оқыс оқиғалар жағдайында ТЖД-ға автоматты хабарлау және тауларда жүру кезінде қауіпсіз қозғалыс бойынша ұсыныстар кіреді. Енді, әсем табиғатқа шығып, саяхатты жақсы көретіндер тауда адасып кетпейтін болады. Бұл жүйені бағыт-бағдар беруші көмекші құрал десе болады. Келушілер картаны өзіне жүктеп алып, қалаған бағыты бойынша қорықпай жүре алады. Адасып кетсе, автоматты түрде төтенше жағдайлар қызметіне хабарлама келеді. Бұл жүйе алдымен біздің абаттандырылған Көкжайлау, Проходное, Фурманов бағыттарына қолданылады. Одан кейін барлық жаяу жүретін маршруттарға енгіземіз. Алдағы уақытта тіпті, автотурларға да енгізу жоспарымызда бар. Әзірге, барша тауға саяхаттауға шығушыларды жалғыз жүрмеуге, жалғыз шықпауға шақырамыз. Жүйе екі жыл ішінде толықтай дайын болғаннан кейін, Алматы әкімдігі балансына беріледі. Цифрлық жүйеге бөлінетін қаражат көлемі 100 млн теңгені құрайды», деп атап өтті BI Group компаниясының «Бақыт соқпағы» жобасын дамыту басқармасының менеджері Александра Кукота.

Оның айтуынша, «Бақыт жолдары» жобасы қолға алынған 2019 жылдан бері 27 шм соқпақ абаттандырылған.

«Бақыт жолы» іске қосылғаннан бері BI Group қала тұрғындары мен туристер үшін қауіпсіз және жайлы инфрақұрылымды құруға айтарлықтай күш жұмсауда. Жеті жыл ішінде бес маршрут ашылды, 10 жаппа, 56 орындық, 30 көрсеткіш және карта, 600 метрлік баспалдақ пен тұтқа, 14 ақпараттық панель орнатылды. Бірінші және екінші кезең жұмыстары аясында Ақбұлақ, Көк-Жайлау, Үш ағайынды, Күмбел, Казачье шатқалы, Каменск үстірті, Батарейка
сарқырамасы, Медеу, Фурманов, Панорама шыңына шығатын жолдар жөнделіп, абаттандырылды. Жалпы инвестиция көлемі шамамен 1 миллион АҚШ долларын (360 миллион теңге) құрады. Бұл жобаға компаниямыздың 150 ден аса қызметкерлері де зор үлестерін қосты. Жыл сайын Алматы тауларына мыңдаған адам жаяу серуендеуге келеді. Бірақ кейбір бағыттар қауіпсіз емес – соңғы 5 жылда 260-тан астам құтқару операциясы жүргізілді. Сондықтан «Бақыт жолдары» жобасы қауіпсіздікті, жайлылықты және экологиялық шешімдерді ұштастыра отырып, табиғатқа қамқорлық жасауды көздейді», дейді Александра Кукота.
Назира ЕЛЕУХАН