Бұл туралы "ҚазМұнайГаз" компаниясының баспасөз қызметі хабарлады.
Қазақстан Венгрияға 85 мың тонна алғашқы мұнай партиясын экспорттады, деп жазады inbusiness.kz сайты.
Мұнай Новороссийск портынан Хорватияның Омишаль портына дейін "Қазақтеңізкөлікфлотының" "Alatau" танкерімен тасымалданған. Ал бұл порттан шикізат Мажарстанның Сазхаломбатта мұнай өңдеу зауытына дейін Адрия мұнай құбыры арқылы жеткізіледі. Бұл мұнай құбырын Хорватияның Jadranski naftovod компаниясы (JANAF) басқарады.
ҚМГ хабарлауынша, Танкер Хорватияға келгеннен кейін ҚМГ, MOL Group және JANAF өкілдерінің кездесуі өткен. Тараптар алдағы өзара тиімді ынтымақтастық мәселелерін талқылады. Келіссөз нәтижесінде ҚМГ мен MOL Group арасында мұнай жеткізу мәселелеріне қатысты Негіздемелік келісімге қол қойылды.
Бұл бастама Қазақстанға ҚМГ мұнайы экспортының географиясын ЕуроОдақ нарығында едәуір кеңейтуге мүмкіндік береді.
Жалпы жарты жыл ішінде "ҚазМұнайГаз" 13 млн тонна мұнай мен газ өндірген.
