Жыл басынан бері Алматы тауларында түрлі жағдайға тап болған 260-қа жуық адам құтқарылды. Олардың қатарында қарапайым туристер де, тәжірибелі альпинистер де бар, деп хабарлайды 24kz.

Кейбір операцияларға тек құтқарушылар ғана емес, ерікті дәрігерлер де қатысады. Солардың бірі – 57 жастағы травматолог-ортопед Константин Морозов. Адамдарға тау басында көмек көрсету – ол үшін тек мамандық қана емес, сонымен қатар сүйікті ісі.

Сәтбаев шыңының биіктігі теңіз деңгейінен 4300 метрден асады. Жақында Сингапурдан келген турист әйел шыңға көтеріліп келе жатып жардан құлап, басынан жарақат алады. Туристті құтқаруға шыққан альпинистермен бірге №4 қалалық аурухананың дәрігері Константин Морозов та тауға аттанады. Ол шетелдік саяхатшыға алғашқы медициналық көмек көрсетіп, жарақат алған әйел базалық лагерьге жеткізілді.

Константин Морозов, Алматы қ. №4 қалалық ауруханасының шұғыл қабылдау бөлімінің дәрігері:

- Адамдар тауға шыққанда қай бағытқа бара жатқанын толық білмейді. Дайындық пен біліктілік жетіспейді. Ең алдымен ауа райына сай киіну керек, байланыс құралдары міндетті түрде болу керек. Қайда, қай бағытта, қанша уақытқа бара жатқаныңызды жақыныңызға айту керек. Бұл ақпарат біреуде сақталуы тиіс. Адамдар сіз туралы біліп жүруі қажет.

Константин Морозовтың 30 жылдық дәрігерлік еңбек өтілі бар. Ол жұмыс істейтін аурухананың қабылдау бөліміне тәулігіне 300-ге жуық адам келеді. Ал бос уақытында альпинистерге алғашқы көмек көрсетуді үйретеді, нұсқаушыларға дәріс оқиды. Дәрігерлік антына адал жан әріптестерінен кеңесін аяған емес. Оған деген науқастардың алғысы да орасан.

Жайлау Абдуллаев, Алматы қ. №4 қалалық ауруханасының жарақат бөлімі меңгерушісі:

- Осы жерге жас маман болып келген кезімде Константин Морозовтың жетекшілігімен жұмысымды бастадым. Ол кісі туралы көп нәрсе айтуға болады. Себебі ол – әрқашан көмекке дайын нағыз кәсіби маман. Ол ешқашан көмектен бас тартпайды, қолдау көрсетеді, ақыл-кеңес береді.

«Туристердің жиі жіберетін қателігі – өз күшін асыра бағалауы әрі арнайы дайындықтың жоқтығы», — дейді Константин Рашидұлы. Қалалық төтенше жағдайлар департаментінің мәліметінше, жыл басынан бері Алматы тауларында 260-қа жуық адам құтқарылып, 180-ге жуық іздестіру-құтқару операциясы жүргізілген.

Авторлары: Гүлжан Көленқызы, Сержан Жұмабаев