Полиция жеткіншектің өліміне қатысты сараптама тағайындады.
Ақмола облысы Қосшы қаласында бес жасар бала суға батып кетті, деп жазады inbusiness.kz сайты.
Қайғылы оқиға 3 тамызда Есіл өзенінде болған. Баланың туыстары оның денесін судан шығарып алған. Оқиға орнына жедел жәрдем келген. Алайда, баланың өміріне араша түсе алмады.
"Қосшы полиция бөлімі бұл деректі соталды тергеудің бірыңғай тізіміне тіркеді. Сараптама тағайындалды", – деді Ақмола облысы полиция департаментінің өкілі.
Айта кетейік, қайғылы жағдай болған канал стратегиялық нысан болып саналады: ол Нұра өзенінің бір бөлігін Есілге бұрып, Астананы техникалық сумен қамтамасыз ету және жерді суару үшін пайдаланылады. Онда шомылуға және жүзуге тыйым салынған.
