Бұл туралы Сауда және интеграция министрлігі мәлім етті.
Министрліктің мәліметінше, тұтынушылардың құқықтарын қорғау саласында азаматтарды қорғау тетіктерін жетілдіруге бағытталған заң жобасы әзірленіп, қазіргі таңда ҚР Парламенті Мәжілісінде қаралуда, деп хабарлайды inbusiness.kz сайты.
Аталған бастамалардың бірі – Тұтынушылардың құқықтарын қорғау жөніндегі Омбудсмен институтын құру.
Заң жобасында осы бірлестіктерге бизнес субъектілерінің қызметіне тұтынушылық мониторинг жүргізу құқығы беріледі. Сонымен қатар, негізгі тұтынушылық құқықтарды коммуналдық, медициналық, көлік, туристік және өзге де қызмет көрсету салаларына тарату көзделіп отыр.
Құжат азаматтық-құқықтық дауларды шешу механизмін жеңілдетуге, тұтынушылардың құқықтарын бұзатын шарт талаптарының жарамсыздығын тануға және қазіргі "Тұтынушылардың құқықтарын қорғау туралы" Заңдағы олқылықтарды жоюға бағытталған. Сондай-ақ басқа заңнамалық актілермен үйлестіру қарастырылған.
Министрлік мәліметінше, Қазақстан Республикасының Әкімшілік құқықбұзушылық туралы кодексіне (ӘҚБтК) маңызды өзгерістер енгізілген және олар қолданылуда.
Атап айтқанда, саналы түрде жалған жарнама жасап, тұтынушыларды адастырғаны үшін 100-ден 1000 АЕК-ке дейін айыппұл көзделген.
Тұтынушылардың құқықтарын қорғау комитетіне ҚР ӘҚБтК-нің 157-бабына және 190-бабының бірінші бөлігіне сәйкес (өлшеу, тарту, есептеу және тұтынушыны алдау фактілері) істерді қарау құқығы берілді. Бұл баптар бойынша 10-нан 50 АЕК-ке дейін, қайталанған жағдайда – 30-дан 200 АЕК-ке дейін айыппұл салу қарастырылған. Сонымен қатар, үш жылға дейін лицензиядан айыру немесе қызметін тоқтата тұру шарасы қолданылуы мүмкін.
190-баптың бесінші бөлігіне сәйкес, бұрын қолданылып келген ескерту түріндегі жаза енді жеке тұлғалар мен бизнес субъектілері үшін 5-тен 25 АЕК-ке дейінгі айыппұлмен алмастырылды.
Онлайн-саудада жаңа талаптар енгізіледі
Заң жобасында онлайн-сауда үшін жаңа ұғымдар мен талаптар енгізілмек. Атап айтқанда:
- электрондық сауда алаңы (маркетплейс),
— интернет-дүкен,
— ақпараттық-жарнамалық алаң.
Сатушыларды тіркеуге арналған ішкі міндетті ережелер, сауда алаңдары мен сатушылар арасындағы шарттарға қойылатын талаптар да заң жобасында қамтылған. Бұл шарттарда тұтынушылардың құқықтарын қорғау туралы заңнаманы сақтау міндетті болып табылады (заң жобасының 10-бабы).
Сонымен қатар, сатушыларға санкция қолдану (мысалы, аккаунттарды бұғаттау), тұтынушыларға тауардың сәйкестік сертификаттарына қол жеткізуін қамтамасыз ету, уәкілетті органдармен өзара іс-қимыл жасау тәртібі де қарастырылған.
