Алматы облысы Райымбек ауданында әкім сайлауы өтті.
Науқанға үш үміткер қатысты. Дауыс беруге жастар, спортшылар, ардагерлер және аудан тұрғындары белсенді қатысып, азаматтық ұстанымдарын танытты. Бұл аудан әкімін тұрғындар тікелей сайлаған алғашқы саяси науқан.
Шекаралық аймақта орналасқан Қызылшекара ауылындағы сайлау учаскесі таңғы сағат 07:00-де жұмысын бастады. Бұл аудан тарихында алғаш рет өткізілген әкім сайлауы. Дауыс берушілердің алғашқы легінде ауыл тұрғыны Әкбар Сәрсенбек тіркелді. Ол 2023 жылы елге қоныс аударған.
Әкбар Сәрсенбек, Қызылшекара ауылының тұрғыны:
- Мен осы Қазақстан мемлекетіне келіп, қазақ азаматтығын алғалы бері тұңғыш рет сайлауға қатысып отырмын. Сайлау өте тәртіпті, ретті, әділ өтіп жатыр екен. Қазақстан азаматы болғаннан кейін бір кісілік азаматтық борышымызды өтеуіміз керек.
Райымбек ауданы әкімі лауазымына үш кандидат тіркелді. Сайлауға бір кандидат партия атынан, ал екеуі өзін-өзі ұсыну жолымен түсті. Аудан бойынша 22 сайлау учаскесі жұмыс істеді. Алғаш рет дауыс берген жастардың үлесі жоғары болды.
Толғанай Қасымхан, бокстан жастар арасында әлем чемпионы:
- Биыл 18 жасқа кіріп, бірінші рет өз дауысымды беріп отырмын. Өз дауысымды ауданыма, ауылыма өз пайдасын тигізер әкімге бердім деп ойлаймын. Жас болсақ та біз де үлкен үлес алып келіп жатқандықтан, әркімнің дауысы ол міндетті деп ойлаймын.
Елжас Серікұлы, «Жасыл ел» жасақшысы:
- Ауданның өсіп-өнуіне бей-жай қарамай, жан жақта жүрген ауылдағы жастар өз дауыатарын беруге міндетті деп ойлаймын. Ауылдың болашағын дамыту ары қарай бізге байланысты.
Аудан әкімін сайлау Мемлекет басшысының былтырғы Жолдауында жарияланған тапсырманың негізінде жүзеге асып жатқан пилоттық жобаның бір бөлігі. Бұған дейін мұндай сайлау тек ауыл әкімдеріне қатысты өткізілген болатын.
Бекболат Бірбаев, Райымбек ауданы ақсақалдар алқасының төрағасы:
- Президентіміз Қасым-Жомарт Тоқаевтың жаңадан шығарған заңы бойынша бұрын ауыл әкімдерін сайлау болатын, енді қазір міне аудан әкімдерін сайлау болып жатыр. Енді оның бәрі елге жақынырақ болады, бір жағынан ел өзінің таңдауын жасайды. Бұрынғыдай жоғарыдан қоя салатын емес.
Гүлбара Бәшебаева, еңбек ардагері:
- Ауданда әкім сайланыпты дегенді ғана еститінбіз. Мынандай шараны бірінші рет деп айтсам болады. Кім бопты, әкім бопты дегенді ғана әйтеуір бір кездесуде көретінбіз. Мынау деген ерекше сайлау. Сайланған әкім ауданымызды көркейтсе екен, ауылымызды көркейтсе екен деймін.
Сайлаудың ресми қорытындысын облыстық аумақтық сайлау комиссиясы ертең жариялайды. Дауыстардың нәтижесі заң талаптарына сәйкес белгіленеді.
Гүлім Советқан, Аманжол Жонкешов
