Әлемнің ең мықты теннисшілері Канаданың Монреаль қаласында өтіп жатқан турнирде сынға түсуде.
Турнирдің төртінші айналымында Қазақстанның бірінші ракеткасы Елена Рыбакина украиналық Даяна Ястремскаяны (WTA рейтингінде 35-орын) 5:7, 6:2, 7:5 есебімен жеңіп, келесі кезеңге жолдама алды.
Кездесу 2 сағат 33 минутқа созылды. Осы уақыт ішінде Рыбакина 7 эйс жасап, 9 қос қателікке жол берді және 9 брейк-пойнттың 5-еуін сәтті жүзеге асырды.
"Бұл өте маңызды жеңіс. Даянамен ойын оңай болған жоқ. Ол өте жақсы ойнады. Матчта жеңіске жеткеніме қуаныштымын. Енді келесі кездесуімді асыға күтемін", — деді Рыбакина матчтан кейін кортта сұхбат барысында.
Ширек финалда Елена тағы бір украиналық теннисші Марта Костюкпен кездеседі. Матч 5 тамыз күні өтеді.
Айта кетейік ширек финалға шыққан Рыбакина 107 000 АҚШ доллар сыйақы мен 215 рейтингтік ұпайға ие болды.
