ҚР Ғылым және жоғары білім министрлігі мен Алматы қаласы әкімдігінің бастамасымен студенттерді жатақханамен қамтамасыз ету мақсатында Қазақ ұлттық қыздар педагогикалық университетінің базасында Ахуалдық орталық ашылды, деп хабарлайды Zakon.kz.
Аталған орталық Алматы қаласы, Бөгенбай батыр көшесі 142 мекенжайында орналасқан университет ғимаратының аумағында орналасқан.
ҚР Ғылым және жоғары білім министрі Саясат Нұрбек аталған орталық жатақханадан орын таба алмаған студенттерге көмек көрсететінін айтты.
"Әр жоғары оқу орнының жанынан арнайы цифрлық платформа құрылды. Ол отандық жоғары оқу орындарының 80%-нда бар. Айта кетейік, Нархоз және Satbayev University-де студент жатақханадан бөлмені, орынды өзі таңдайды. Ал жатақханадан орын ала алмаған студенттер Қазақ ұлттық қыздар педагогикалық университетінің базасында ашылған Ахуалдық орталықтың көмегіне жүгіне алады. Сондай-ақ Алматыда бос орын таба алмай қиын жағдайға тап болған студенттерге университеттермен бірлесе төтенше жағдайға арналған 55 арнайы бөлме дайындадық", – деді министр.
Орталықта 10 толыққанды жұмыс орны бар. Арнайы жұмыс орны заманауи компьютерлермен, байланыс құралдарымен, цифрлық дерекқорларға қолжетімділікпен және жоғары оқу орындарымен жедел байланыс арналарына (бір нөмірге бір уақытта қосылатын 10 байланыс желісі) қосылған жүйемен жабдықталған. Сонымен қатар орталықта жиналыстар мен брифингтер өткізуге арналған конференц-зал, келушілерге арналған күту және демалыс аймағы мен оқу бұрышы қарастырылған.
Министрдің айтуы бойынша, жатақхана мәселесін шешу үшін елімізде арнайы нормативтік субсидиялар ұлғайтылды, жекеменшік мердігерлерді, компанияларды тартып, 5 жылдың ішінде 400-ден астам жатақхана салынды.
Сондай жобалардың бірі ретінде кәсіпкер Бауыржан Кәрібжанов Алматыда қалаға келген студенттерді орналастыратын жатақхана салып, қолданысқа беріп жатыр.
"Бұл жатақхана 4 қабаттан тұрады. Әр қабатта 12 пәтер бар. Бір пәтерде екі жатын бөлме бар, әр бөлмеде 4 студент тұрады. Пәтердің ішінде барлық жағдай жасалған – заманауи асхана, тоңазытқыш, кір жуатын машина, жуынатын бөлме мен дәретхана бар. Сонымен қатар ғимарат өрт қауіпсіздігі жүйесімен жабдықталған, өрт датчиктері орнатылған. Қауіпсіздікке ерекше көңіл бөлдік. Студенттерді жатақханаға 1 қыркүйектен бастап келісімшарт негізінде қабылдай бастаймыз", – деді инвестор.
Осылайша, Алматыда Ситуациялық орталықтың іске қосылуы студенттердің тұрмыс жағдайын жақсарту және білім алушы жастарды қолжетімді тұрғын үймен қамтамасыз ету бойынша кешенді жұмыстардың тағы бір қадамы болды.
Бұған дейін Алматыда бір аудан тұрғындарына сүйінші хабар жеткізілді.
