"Сырым" өткізу пунктінде қайта жаңарту жұмыстарының басталатынына байланысты "ҚазАвтоЖол" өкілдері жүргізушілерге маңызды ақпарат жариялады, деп хабарлайды KAZ.NUR.KZ ұлттық компанияның баспасөз қызметіне сілтеме жасап.
Компания мәліметінше, 2025 жылғы 4 тамыздан бастап Қазақстан мен Ресей арасындағы "Сырым" автокөлік өткізу бекетінде қайта жаңарту жұмыстары басталады.
Өткізу пунктінде келесідей шектеулер енгізіледі:
- Жеңіл автокөліктерді өткізу уақытша тоқтатылады;
- Қоғамдық көліктерді шекарадан өткізу 2025 жылғы 31 тамызға дейін ұзартылды;
- Жүк автокөліктері үшін шекарадан өту электронды кезек жүйесі арқылы жүзеге асырылады (тәулігіне 500 көлік құралына дейін).
Сонымен қатар компания өкілдері мемлекеттік шекараны өтуге арналған баламалы өткізу пункттерінің тізімін жариялады.
"Шаған" (ҚР) / "Тёплое" (РФ) — екіжақты, Қазақстан және Ресей азаматтарына арналған. KZ07-01 Орал — РФ шекарасы (Шаған өткізу пункті) автомобиль жолының 33 шақырымында орналасқан;
"Ақсай" (ҚР) / "Илек" (РФ) — халықаралық өткізу пункті. KZ07-04 Подстепное — Федоровка — РФ шекарасы (Ақсай өткізу пункті) автомобиль жолының 144 шақырымында орналасқан;
"Тасқала" (ҚР) / "Озинки" (РФ) — халықаралық өткізу пункті. KZ07-06 Орал — Тасқала — РФ шекарасы (Тасқала өткізу пункті) автомобиль жолының 104 шақырымында орналасқан.
"ҚазАвтоЖол" ұлттық компаниясы барлық жол пайдаланушыға сапарларын алдын ала жоспарлап, аталған өткізу пункттерінде көлік кептелісі болатынын ескеруді сұрайды.
Мәтіннен қате тапсаңыз, бізге жазыңыз
