Петропавлда өзі тұратын үйдің ортақ чатында өзгеге жала жапқан әйел жауапқа тартылды, деп хабарлайды Солтүстік Қазақстан облыстық сотына сілтеме жасаған KAZ.NUR.KZ.
Соттың ресми Telegram-каналында хабарланғандай, Петропавл қаласының Әкімшілік құқық бұзушылықтар жөніндегі мамандандырылған сотында Қазақстан Әкімшілік құқық бұзушылық туралы кодексінің 73-3-бабы 2-бөлігі бойынша әкімшілік құқық бұзушылық туралы іс қаралды.
Сот отырысында анықталғандай, 2025 жылғы маусым айында К. өзі тұратын үйдің ортақ чатында бұрынғы ОСИ төрағасы тұрғындарды жаңылыстырады, жалған шарттар ұсынады, жалпы жиналыс өткізбей, ОСИ бюджетінен дәлелсіз шығындарға ақша алады деген жалған ақпарат таратқан.
Сот отырысында К. кінәсін ішінара мойындады. Алайда бұрынғы ОСИ төрағасының қаржылық құқық бұзушылықтарын дәлелдейтін құжаттар ұсынылған жоқ.
Қазақстан ӘҚБтК-нің 73-3-бабы 2-бөлігіне сәйкес, жала жабу – басқа адамның ар-намысына, қадір-қасиетіне нұқсан келтіретін не оның іскерлік беделіне зиян келтіретін көрінеу жалған мәліметтерді бұқаралық түрде немесе телекоммуникация желілері арқылы тарату — әкімшілік жауапкершілікке әкеп соғады.
Істі қарау нәтижесі бойынша сот К.-ны әкімшілік құқық бұзушылық жасағаны үшін кінәлі деп танып, оған 495 432 теңге мөлшерінде әкімшілік айыппұл түріндегі жаза қолданды.
Қаулы заңды күшіне енген жоқ.
Мәтіннен қате тапсаңыз, бізге жазыңыз
