Қазақстан Сауда және интеграция министрлігі АҚШ-тың қосымша тарифтер енгізу мәселесіне қатысты түсініктеме берді, деп хабарлайды KAZ.NUR.KZ.

Сауда және интеграция министрлігінің хабарлауынша, Қазақстан АҚШ тарабынан қосымша тарифтер енгізу мәселесіне байланысты келіссөздерді жалғастырып жатыр.

"Осы үдеріс аясында биыл маусымда Қазақстан Сауда және интеграция министрлігінің өкілдері АҚШ тарабымен екіжақты кездесу өткізді. Қазақстан АҚШ-қа өзара тиімді сауда ынтымақтастығын дамыту, тауар жеткізу тізбектерін тұрақты сақтау және нарыққа әділ қол жеткізу шарттарын қамтамасыз ету мәселелерін қамтитын ресми ұсыныс жолдады. Бұл ұсыныс АҚШ президенті Дональд Трамптың 2025 жылғы 2 сәуірдегі Жарлығы мен оған енгізілген кейінгі өзгерістерді ескере отырып әзірленген.

Келіссөздер барысында тараптар сауда-экономикалық қатынастар бойынша кеңейтілген екіжақты диалог аясында ұсынылған бастамаларды жан-жақты қарастырып отыр. Қазақстан тарабы сындарлы ынтымақтастыққа бейіл екенін растайды. Қарсы тарап та келіссөздерді жалғастыруға ашық. Бұл өз кезегінде өзара тиімді әрі екі елдің мүдделеріне сай келетін шешімдерді әзірлеуге мүмкіндік береді", — дейді министрлік өкілдері.

Бұған дейін министрлік хабарлағандай, енгізілген тариф шаралары АҚШ-қа Қазақстаннан жеткізілетін жалпы экспорт көлемінің небәрі 4,8 пайызына әсер етеді, ал қалған 95,2 пайызы жаңа кедендік баждан тыс қалады.

Қазіргі уақытта Қазақстан АҚШ-қа мұнай, уран, күміс, ферроқорытпалар, тантал, титан, бериллий және өзге де өнім түрлерін экспорттайды. Бұл өнімдердің басым бөлігінің жаңа тарифтік реттеуге қатысы жоқ және шектеусіз экспортталып жатыр.

Жаңа тарифтердің ықпалы сары фосфор, ферросилиций, линзалар, бидай глютені және аммоний нитраты сынды тауарларға тиеді.

Министрлік ақпаратына сенсек, 2025 жылдың бірінші жарты жылдығында АҚШ-қа сары фосфор экспорты 2,2 мың тоннаны құрады (жалпы өндіріс көлемі 43 мың тонна). Ферросилиций бойынша экспорт көлемі 1 482,6 тонна (жалпы өндіріс 41 830,1 тонна). Аммоний нитраты (аммиак селитрасы) бойынша АҚШ-қа тасымал жоқ, 2025 жылға экспорт жоспарланбаған. Бидай глютені (глютен) бойынша 2025 жылдың алғашқы алты айында АҚШ-қа 6 500 тонна өнім жөнелтілді (шамамен 8,12 млн АҚШ доллары).

Мәтіннен қате тапсаңыз, бізге жазыңыз