Белгілі әзілкеш Қайрат Әділгерей журналист Әйгерім Сейфоллаға берген сұхбатында жастық шағындағы достары туралы шынайы естелігімен бөлісті, деп хабарлайды Skifnews.kz ақпарат порталы.

Ол уақыт өте келе досқа деген көзқарасының өзгергенін, ал кейбір шешімдеріне өкініш білдіретінін жасырмады.

«Қазір ойлап қарасам, достарымның қалай келіп, қалай кетіп қалғанын да байқамай қалыппын. Уақытымды кімге арнадым, не үшін сонымен бірге жүрдім — соның бәріне қазір жүрегім ауырады. Олар менің өміріме кіріп, уақытымды жеп кетті. Солар үшін отбасыммен керіскен кездерім болды. Әйеліме ауыр сөздер айтып, көңілін түсірген сәттерім бар. «Менің досым келіп тұр, уақыт өткізбейін бе?» деп еркектік амбициямен ұрысқан кездерімді есіме аламын», — дейді актёр.

Ол бүгінде өмірден өткен, алыстап кеткен немесе жанынан жоғалған достары жайлы ойланып, өткенге сын көзбен қарайтынын айтты.

«Өмірімде қаншама адам кіріп-шығып кетіпті. Бірақ соларға кеткен уақыт – енді қайтып келмейтін ең қымбат нәрсе екенін енді түсіндім», – деді ол.