Жаз басталмай-ақ күн қатты ысып, біраз елді қазірден әбігерге түсірді.
АҚШ-тағы Техас штатының бірнеше өңірін жайлаған аптапты мамандар от жағатын пешпен бірдей деп сипаттады, деп хабарлайды inbusiness.kz сайты nbcdfw.com-ға сілтеме жасап.
Олар маусым басталмай температураның жоғарылуын қуаңшылықпен, оңтүстіктен соққан жылы ауа ағанымен байланыстырады. 2023-2024 жылдар адамзат тарихында ең ыстық ауа райы ретінде тіркелген болатын. Енді биыл да бұл көрсеткіштің өзгеруі екіталай.
Дүниежүзілік метеорологиялық ұйым өкілдері 2025 жылы жаһандық орташа температура 1,29°C пен 1,53°C аралығында болады деп болжап отыр. Бұл кейінгі жылдармен салыстырғанда жер беті одан бетер қыза түседі деген сөз.
"Неге бұлай болып жатыр және жалғаса ма деген сұрақтарға жауап беру өте қиын. Бар білетініміз, қазір қалалар бой көтеріп, урбанизация қарқынды дамып жатыр. Бұлай жалғаса берсе, адамзат өмір сүру салтын өзгертпесе, ағаштар көбірек отырғызылмаса, көлеңке немесе басқа да жеңілдететін факторлар болмаса, жағдай жақсармайды. Жер беті қазірдің өзінде құрғақ, өйткені қуаңшылық жайлаған", — дейді Техас университеті Жер және планета ғылымдарының профессоры Дэв Нийоги.
АҚШ-тың Техас штатында күннің қатты ысуына байланысты төтен ше ескерту жарияланды. Сынап бағанасы цельсий бағамымен 38 градустан асады.
Ұлттық метеорология қызметінің дерегі бойынша, мұндай көрсеткіш 1998 жылдан бері алғаш рет тіркеліп отыр.
Қазір көп өлкеде өрт қаупіне қатысты Батыс Техаста, барлық Нью-Мексикода және Оклахома, Аризона және Колорадо штаттарының бөліктерінде ескерту жарияланды. Ылғалдылық өте төмен, 10%-дан төмен болды және желдің екпіні 60 мильге (97 км/сағ) дейін тіркелген.
Күннің ысуы жөнінен Азия бойынша Пәкістанның Лахор қаласында осы аптада ауа температурасы 43 градусқа дейін жетті.
