Саяжай маусымы қызып тұр. Дәл осы уақытта саяжай ұрлықтары жиілей түседі. Көбінесе, мұндай жағдайлар иелердің өз мүлкіне бейқам қарауынан туындайды.
Жуырда Павлодар облысының полициясына қала тұрғыны шағым түсірді. Айтуынша, белгісіз біреулер саяжайда ешкімнің жоқтығын пайдаланып, темір крандарды шешіп әкетіп, көкөністерді ұрлап, қақпаларды бүлдіріп кеткен.
Қазір бұл дерек бойынша полиция жедел-іздестіру шараларын жүргізіп, күдіктілерді анықтауға кірісті. Полиция қызметкерлері саяжай иелеріне мүліктерін сақтап қалу үшін қарапайым қауіпсіздік шараларын естен шығармауға кеңес береді.
Қауіпсіздік шаралары:
- Саяжайда бағалы заттарды қалдырмаңыз;
- Үйге бөгде адамдар кіре алмайтындай берік есіктер орнатып, сенімді құлыптармен жабыңыз;
- Терезелерге тор орнатыңыз;
- Егер саяжайда тұрақты тұратын көршілеріңіз болса, олардан үйіңізді бақылап жүруді, күмәнді жағдайлар жайында дереу хабарлауды өтініңіз.
Егер шақырылмаған қонақпен бетпе-бет келіп қалсаңыз, дауға араласпағаныңыз жөн. Ең маңыздысы — өмір мен денсаулық.
Мұндай жағдайда адамның сырт келбетін, ерекшеліктерін есте сақтап, бірден "102" арнасына немесе "Police 102" мобильді қосымшасы арқылы хабарласыңыз. Полиция жасағы келгенше қауіпсіз жерге шығып, сабыр сақтаңыз.
