Әрбір адамның өмірлік өнегесі оның ұс­танымының қалып­тылығы, көзқарасының тереңдігі, ақырын жүріп анық басқан байып­ты болмысы, халқына сіңірген еңбегі, арқалаған аманатымен өлшенеді. Өмір керуенінде өзіндік жолымен танылған сондай жанның бірі – мәдениет қайраткері, мемлекеттік қызмет ардагері Қанымжан Шотбайқызы Сұлтанқұлова.

«Әдемі қартаюдың негізі – мәдениетте» деп білетін Қанымжан Шотбайқызының Алматы облысының мәдениет саласына сіңірген еңбегі орасан. Тәуелсіз ел атанған алғашқы жылдардың қиын-қыстау шағын­да бойындағы білім-білі­гін, күш-қайратын өңір рухания­тының жандануына сарп етті. Еңбек жолын Талғар ауданында ұстаздық­тан бастаған Қ.Сұлтанқұлова оқу ісінің ілгері­леуіне ізденім­паздықпен атсалысты. Мың­даған балалардың кеудесіне білім-ілімнің сәулесін құйды. Ұстаздық ете жүріп, оша­ғының түтінін түтетті, бесігін тербетті. Ұрпақ тәрбиесіндегі елеулі еңбегі ескеріліп, «Қазақстан Республикасы білім беру ісінің үздігі» атанды, министрліктің Құрмет грамотасымен марапатталды.

Ұрпақ сабақтастығы мен тәрбиесіне қамқор бола білген білікті педагогтің іскерлік, ұйымдастырушы­лық қарым-қабілеті ескеріліп, мемлекеттік қызметке тартылды. 1994–1998 жылдар аралығында Талғар ауданы,­ одан кейінде Еңбекшіқазақ ауданы әкімінің орынбасары болып, өңірдің дамуына лайықты үлес қосты. Жауап­ты қызметтерді абыроймен атқарып, қос аудан­ның әлеу­меттік-экономикалық дамуына еселеп еңбек сіңірді. Елдің еңсесін тіктеп, етек-жеңін жиюына аналық жүрегімен, ізгі тілегімен қамқоршы бола білді.

Саналы ғұмырының бес жылында, яғни 1999–2004 жылдар аралығында Алматы облысының мәдениет басқар­масының бастығы бо­лып тағайындалып, на­рық тұсындағы қаржы тапшы­лы­ғынан тұсауланған халықтық өнердің өн бойына қан жү­гіртіп, барын құрап, жоғын тү­гендеп, мәдениеттің жандауына атсалысты. Ұлттық құн­дылықтарымыздың жанашыры бола білген аяулы жан сол бір өліара шақта мәдениетіміз бен өнерімізді, рухымызды көтеру жолында тыным таппады. Еңбегі елеусіз қалмай, 2021 жылы Алматы облысының құрметті азаматы атанды.

«Әдемі қартаю – Алланың адамға берген сыйы. Өкінішке қарай, кәрілікке жете алмай қалатындар да бар. Осы жас­қа дейінгі өмір жолымызда талай қилы кезеңдерден өттік. Ел алдына түспесек те, қатардан қалмадық. Тәуел­сіз еліміздің гүлденуіне, ха­лық­тық мұраларымыздың жар­қырап, жандануына шама-шарқымызша қызмет еттік. Мем­лекеттік қызметке бірге жегілген замандастарымның, әріп­тестерім­нің көкейінде елдік мүддеге қызмет ету қашанда жанбағыстан жоғары тұрды», дейді Қанымжан Шотбайқызы.

Терең білім-білік, кең парасат-пайым иесі зейнетке шық­қалы бері де қоғамнан шет қалмай, бүгінде Әді­летті Қазақстанның дамуына үн қосып келеді.

«Мемлекет басшысы Қасым-Жомарт Тоқаевтың Қазақстан халқына арнаған был­тырғы Жолдауында еңбек еткен адамның қадірлі болатыны баса айтылды. Әркім өз ісіне жауапкершілікпен қарау керектігін еске салды. «Жұмыс­тың көзін тапқан байлықтың өзін табады» деген даналықты алға тартты Президент. Кез келген адам өзінің міндетін дұрыс, адал атқарып, адамгершілікпен жұмыс істейтін болса абырой биі­гінен көрінеді. Сонымен қатар еткен еңбегі өскелең ұрпаққа үлгі-өнеге болады», деп толғанады еңбек ардагері.

«Ұршығын иіріп, немере-шөберелерінің ортасында жай­қалып отыратын аналардың өн бойынан бақыттың, қуа­ныштың лебі есіп тұрады. ­Өмір­ге құштар адам ешуақытта қар­тайып келемін деп ойламайды, тұла бойына сіңген отаншыл қасиетімен ел мен жерге қызмет еткеннен, бала-шағаның күйін күйттегеннен талмайды, шаршамайды», дейді ұлын ұяға қондырып, қызын қияға ұшырып, тілі тәтті немерелерін тәрбиелеп отырған ардақты әже Қанымжан Шотбайқызы.

Алматы облысы