Бұл туралы өңір әкімі Марат Ахметжанов мәлімдеді, деп жазады inbusiness .kz сайты.
Ақмола облысында сібір жарасының таралуына байланысты облыстық ветеринария басқармасының басшысы тәртіптік жауапкершілікке тартылды.
– Мен ветеринария басқармасы басшысына қызметтік міндеттеріне толық сай келмегені үшін ескерту жарияладым. Қызметтік тексеріс нәтижесінде тағы бірнеше жауапты тұлға жазаланады, – деді әкім.
Оның айтуынша, індет ошағы жойылып, жағдай бақылауға алынған. Науқастармен байланыста болған адамдар толықтай тексерілген, олардың арасында инфекция анықталмаған.
– Сібір жарасы 8 адамнан расталды. 7-еуі емделіп шықты, біреуі емделу үстінде. Жағдайы жақсы, толық сауыққанша бақылауда болады. Ошақ толық жойылды. Қазір қауіп жоқ, – деп мәлімдеді Ахметжанов.
Ол сондай-ақ індеттің шығуына ықпал еткен факторларды атады. Анықталғандай, инфекция су тасқыны салдарынан 1940-жылдардағы ескі көмілген ошақтардың бүлінуінен кейін тараған.
– Бұрынғы көмілген орындар кеміргіштер арқылы инфекцияны таратқан. Қазір күдік тудырған барлық аумақтар оқшауланып, бетонмен бекітілуде. Зерттеушілер тобын өзіміз шақырып, қаржыландыруды да қамтамасыз еттік. Жүргізіліп жатқан шаралар – ғылыми негізделген, – деді облыс басшысы.
Оның айтуынша, қазіргі таңда халық үшін ешқандай қауіп жоқ.
