Жобаның жалпы құны – 9,5 млрд теңге.
Қазақстанның Даму Банкі Алматы облысында жеміс пен көкөніс өңдейтін зауыт салу ісін қаржыландырады, деп жазады inbusiness.kz сайты.
Өндірісті ашуға Түркияның Goknur Gida компаниясы стратегиялық серіктес ретінде тартылмақ. Аталған компания жеміс, органикалық шырын, концентрат және пюре өндірумен айналысады. Ол зауытқа технологиялық жабдық жеткізеді әрі дайын өнімді оффтейк-келісім аясында толық сатып алуды жоспарлап отыр.
Зауытта жеміс шырындарының концентраты мен көкөніс және жеміс пюресі өндірілмек. Сонымен қатар өнімді сақтап, буып-түюге арналған инфрақұрылым салынады.
Кәсіпорын жылына 70 мың тоннаға дейін жеміс пен көкөністі қайта өңдейді. Соның нәтижесінде жылына 6150 тонна шырын концентраты мен 6700 тонна пюре өндіру көзделіп отыр. Дайын өнімдер ішкі нарық пен шетелге экспортталады деп күтілуде.
Зауытты іске қосу 2026 жылдың сәуір айына жоспарланған.
