Бұл мақсатқа бюджеттен 50 млрд теңге қарастырылған.
1 тамызда мемлекеттік қолдаудың жаңа құралы – мал шаруашылығы саласында жылдық мөлшерлемесі 5 пайыз болатын жеңілдікпен несие беру басталады, деп жазады inbusiness.kz сайты.
Бұл туралы Ауыл шаруашылығы министрі Айдарбек Сапаров АӨК-тің бірінші жартыжылдықтағы даму қорытындылары бойынша өткен кеңейтілген кеңесте мәлімдеді.
Бағдарламаның қолжетімділігін арттыру үшін бордақылау алаңдарына қойылатын талаптар қайта қаралған. Сонымен қатар асыл тұқымды мал сатып алуға арналған "Игілік" бағдарламасы іске қосылады.
"Өткен жылы фермерлер экономиканың барлық салалары арасында рекордтық өнім мен нақты көлем индексінің ең жоғары өсімін қамтамасыз етті. Бүгінгі таңда қаржыландыру бағдарламалары кеңейіп, мемлекеттік қолдау күшейіп келе жатқанда, біз оның қарқынын төмендетуге құқығымыз жоқ. Барлық деңгейде нақты үйлестіру және жеке жауапкершілік қажет", – деп мәлімдеді сала басшысы Айдарбек Сапаров.
