Мұндай заңбұзушылықты бас көлік прокуратурасы анықтады.
Бас көлік прокуратурасы тексеру барысында сыртқы экономикалық қызметке қатысушылар тыйымды айналып өтіп, қолданылған шиналарды дөңгелек дискілерімен бірге әкелетінін анықтады, деп жазады inbusiness.kz сайты.
Қазақстанның кеден заңнамасы мен Еуразиялық экономикалық одақтың нормалары денсаулық пен экологияға қауіпті тауарлардың әкелінуін қатаң реттейді. Олардың қатарына тек арнайы рұқсат болған жағдайда ғана әкелуге рұқсат етілетін, қолданылған автокөлік шиналары (ТН СЭҚ коды 4012) да кіреді.
"Мәселен, биыл сәуір-маусым айларында бір өңірде салмағы 1,5 мың тоннаға жуық қолданылған шиналардың 159 заңсыз әкелу дерегі тіркелді. Тағы бір өңірде өткен жылдары 200 тоннадан астам осындай өнім әкелінген. Мұндай шиналар қауіпті қалдықтар ретінде жіктеледі, олардың пайдаланылуы жол қозғалысы қауіпсіздігіне және қоршаған ортаға қауіп төндіруі мүмкін", – деп хабарлады бас көлік прокуратурасы.
Прокуратураның араласуынан кейін Мемлекеттік кірістер комитеті бақылауды күшейтті.
