Алматы полиция департаменті бүгін, 29 шілдеде өтетін "Қайрат" — "КуПС" матчына байланысты алматылықтарға үндеу жасап, қоғамдық тәртіпті сақтауға және полиция қызметкерлерінің талаптарына бағынуға шақырады, деп хабарлайды KAZ.NUR.KZ.
Алматы қалалық полиция департаментінің мәліметінше, УЕФА Конференциялар лигасының екінші іріктеу кезеңіндегі "Қайрат" (Алматы) және KuPS (Финляндия) командалары арасындағы матч барысында қоғамдық тәртіп пен жол қауіпсіздігін қамтамасыз етуге шамамен 1,5 мың полиция қызметкері жұмылдырылады.
Матчты тамашалауға көптеген жанкүйер келеді деп күтілуде, осыған байланысты полицияның кешенді күштері күшейтілген тәртіпте жұмыс істейді.
"Қоғамдық тәртіпті сақтау, құқықбұзушылықтардың алдын алу және көлік қозғалысын реттеу мәселелеріне ерекше назар аударылады.
Арнайы көлік құралдарының еркін қозғалысын қамтамасыз ету және көлік кептелістеріне жол бермеу мақсатында Абай даңғылы – Байтұрсынов, Мұқанов және Сәтпаев көшелерімен шектелген аумақта автокөлік қозғалысына ішінара шектеу қойылуы мүмкін.
Алматы қалалық полиция пепартаменті, тұрғындарды бағыттарын жоспарлау кезінде осы ақпаратты ескеруге, қоғамдық тәртіпті сақтауға және полиция қызметкерлерінің талаптарына бағынуға шақырады", — делінген хабарламада.
Мәтіннен қате тапсаңыз, бізге жазыңыз
