Жоба аясында әрбір әскери қызметшіге фитнес-білезік беріледі
Бұл туралы Caravan.kz медиа порталы Sputnik.kz-ке сілтеме жасап хабарлайды.
Қазақстанда мерзімді әскери қызметтің жаңа форматы енгізіледі.
«SARBAZ+» пилоттық жобасы әскери қызметшілерді даярлау сапасын арттыруға және заманауи технологияларды күнделікті әскер өміріне енгізуге арналған. Биыл күзде Алматы облысында орналасқан Әуе қорғанысы күштерінің 78460 әскери бөлімінде 150 әскерге шақырылушы жаңа үлгі бойынша қызмет атқара бастайды.
Жоба аясында әрбір әскери қызметшіге фитнес-білезік беріледі. Сол арқылы нақты уақыттағы биометриялық көрсеткіштер бақыланады. Барлық ақпарат медициналық персонал мен командирлерге қолжетімді орталықтандырылған мониторинг жүйесіне келіп түседі. Осылайша жеке құрамның денсаулық жағдайын тұрақты бақылауға мүмкіндік болады. Бейне талдау жүйесі де енгізіледі.
Ал әскердегі қызмет аяқталғаннан кейін қатысушылар аттестаттаудан өтіп, жұмысқа орналасу кезінде пайдалы сертификаттар ала алады. Оған қоса, ұшқышсыз аппараттар мен радиобайланысты пайдалану негіздері оқытылады. Қосымша қазақ және ағылшын тілдері бойынша сабақтар да болады.
«Әскери қызметшілердің психологиялық күйін қолдау үшін эмоцияны шығару бөлмесі ашылады. Офицерлер мен сержанттар үшін заманауи, құзыретті және стресске төзімді әскери маман қалыптастыруға бағытталған жеке тұлғаны дамыту бойынша тренингтер қарастырылған», — дейді министрлік мамандары.
Алайда жаңа бағдарламамен барлығын бірдей қабылдай бермейді. Әскерге шақырылушылар арасында іріктеу жүргізіледі. Ол үшін алдымен сайтта тіркелу керек. Платформада қызметке кіру тәртібі, өту шарттары және іріктеу кезеңдері туралы ақпарат та бар. Онлайн-тіркеуден кейін үміткерлерді арнайы комиссия іріктеп алады.
Қорғаныс министрінің орынбасары Дархан Ахмедиевтің айтуынша, жоба сәтті іске асырылған жағдайда оны Қарулы күштердің басқа да бөлімшелеріне кезең-кезеңімен енгізу жоспарланып отыр.
