Қос тарап тиімді келісімге қол жеткізген .
АҚШ пен Еуропалық одақ сауда келісімі бойынша ортақ мәмілеге келді, деп хабарлайды inbusiness.kz сайты BBC-ге сілтеме жасап.
Ақ үй басшысы мен Еурокомиссия төрағасы Урсула фон дер Ляйен Трамптың Шотландиядағы гольф-клубында кездесті. Дональд Трамптың сөзінше, АҚШ-та Еуроодақтан келетін тауарларға 15 пайыздық кедендік баж салығы салынады. Алдағы төрт жыл ішінде Еуроодақ елдері АҚШ-тан 750 миллиард доллар көлемінде әскери техника мен энергия тасымалдаушылар сатып алып, америкалық экономикаға 600 миллиард доллар инвестиция құятыны белгілі болды.
БАҚ-тың хабарлауынша, Урсула фон дер Ляйен қос тарап тиімді келісімге келді деп айтқан.
АҚШ пен Еуроодаққа әлемдік тауарлар мен қызметтер саудасының шамамен үштен бірі тиесілі. ЕО-дан АҚШ-қа келетін импорт көлемі Еуропаға жөнелтілетін америкалық тауарлардың экспортынан айтарлықтай көп. Сол себепті Дональд Трамп бұл "сауда теңсіздігін" жойғысы келеді.
