Жеңіс Қасымбек Instagram парақшасында жаңадан ашылатын мектептер жайлы жазды, деп хабарлайды inbusiness.kz сайты.
"Қаланың даму барысында әлеуметтік нысандардың құрылысына ерекше назар аударамыз. Өткен оқу жылында рекордты көлемде оқу орындары салынды. Атап айтқанда, 24 мектеп пайдалануға беріліп, 66 мың оқушыға арналған орын (екі ауысымды) ашылды. Сол 24 мектептің 16-сы – жайлы мектеп.
ҚР Премьер-министрінің бірінші орынбасары Роман Склярмен және оқу-ағарту министрі Ғани Бейсембаевпен бірге жайлы мектептердің салыну барысымен таныстық. Мектептер қаланың барлық ауданында орналасады.
Жаңа оқу жылы ішінде тағы 15 мектеп ашуды жоспарлап отырмыз. Оның 7-еуі "жайлы мектеп" ұлттық жобасы аясында салынады. Бұл жайлы мектептер 28 мың оқушыға арналған орын (екі ауысымды) ашуға мүмкіндік береді. Нәтижесінде, 4 үш ауысымды және 7 шамадан тыс толы мектептің проблемасы шешіледі.
Осылайша, Мемлекет басшысының тапсырмасы аясында Астанадағы жайлы мектептердің жалпы саны 24-ке жетеді. Сонымен қатар, қалада балабақшалар, оқушылар сарайы және өзге де әлеуметтік нысандар салынып жатыр", – деп жазды Жеңіс Қасымбек.
