Қарағанды облыстық Психикалық денсаулық орталығында есірткі заттарын дәл анықтайтын заманауи газдық хроматограф қолданысқа енгізілді, деп жазады inbusiness.kz сайты.
Бұл құрылғы бірнеше күн бұрын пайдаланылған психобелсенді заттарды да микродозада анықтауға қабілетті.
Жаңа құрылғы кез келген биологиялық сұйықтықтан тек дәстүрлі емес, сонымен қатар синтетикалық препараттарды да жоғары дәлдікпен анықтайды.
Құрылғының базасында 2000-нан астам химиялық қосылыс тіркелген. Аппарат жергілікті бюджет қаражатына 180 миллион теңгеге сатып алынып, клиникалық тәжірибе кезінде өз тиімділігін дәлелдей бастаған.
– Кейде экспресс-тесттер теріс нәтиже көрсеткенімен, пациенттің ағзасында нақты синтетикалық психостимулятор болғаны белгілі болады. Жаңа хроматограф мұны дәл көрсетті. Құрылғының сезімталдығы өте жоғары, – дейді Қарағанды облыстық Психикалық денсаулық орталығы директорының стратегиялық даму жөніндегі орынбасары Василий Габов.
Мамандардың айтуынша, хроматограф медициналық сараптамалардың сапасын айтарлықтай арттырады.
Ол есірткіге мас күйде көлік тізгіндеген жүргізушілерді анықтауда таптырмас құрал болмақ. Енді тыйым салынған заттар ғана емес, құрамында психобелсенді компоненттері бар дәрілер де есепке алынады.
Сонымен қатар, құрылғы әділетсіз айыптаулардан да қорғай алады. Егер жүргізуші дәрі ішіп немесе құрамында мак бар өнім тұтынып, тесттен қате нәтиже алса, хроматограф оның кінәсіздігін ғылыми түрде дәлелдейді.
Құрал клиникалық диагностикада да маңызды рөл атқарады. Көптеген науқастар нақты қандай зат қабылдағанын білмейді. Хроматограф дәрігерлерге пациенттің жағдайын нақты бағалап, тиімді ем тағайындауға көмектеседі.
– Бұған дейін де ата-аналар балаларына күмәнданып, оларды орталыққа әкелетін. Біз экспресс-тест жасап, ештеңе анықтамай, тек сырттай бақылаумен шектелетінбіз. Енді біз нақты нәтижеге сүйене отырып, дер кезінде әрекет ете аламыз, – дейді Василий Габов.
Қазіргі таңда облыста есірткіге тәуелді ретінде тіркеуде тұрғандардың саны шамамен 8 мың адамды құрайды. Алайда мамандар бұл көрсеткіштің төмендеуі шынымен де нашақорлардың азайғанын білдірмейтінін айтады.
– Статистиканың төмендеу кейбір науқастардың анонимді түрде емделуіне байланысты, – деп түсіндірді орталық мамандары.
Сондай-ақ, жол-көлік қауіпсіздігі тұрғысынан алғанда, есірткі немесе алкогольдік мас күйде көлік жүргізетіндер азаймай отыр.
Сарапшылардың пікірінше, жаңа құрылғы құқықтық және медициналық салада бұл мәселемен күресте маңызды құралға айналады.
