Еуропалық "Lufthansa" әуе компанияның ұшақтары Қазақстанға қатынауын уақытша доғарады. ҚР Көлік министрлігі оның үш себебін атады, деп хабарлайды Zakon.kz.
Құзырлы ведомство мәліметінше, "Lufthansa" әуе компаниясы ұшуларды 2025 жылғы 26 қазан мен 2026 жылғы 29 наурыз аралығында уақытша тоқтата тұрады. Оның себептері келесідей:
- Әскери қақтығыстарға байланысты Ресей Федерациясының әуе кеңістігін айналып ұшу компания шығындарының артуына әкелді.
- Әуе кемелерінің жетіспеушілігі, сондай-ақ жаңа ұшақтар мен қосалқы бөлшектердің жеткізілуінің кешігуі де әсер етуде. Қазіргі уақытта көптеген халықаралық әуе компаниялар тапсырыс берген әуе кемелерін уақытында ала алмауына байланысты өздерінің тасымалдау жоспарларын қайта қарауда.
- Маусымдық жолаушылар ағынының төмендеу үрдісі көптеген әуе тасымалдаушыларына тән.
"Сонымен қатар, Астана және Алматы қалалары арқылы ұшу компанияның жеке шешіміне байланысты рейстердің жүктемесін қамтамасыз ету мақсатында жалғасып жатқанын атап өтеміз", деп нақтылайды Көлік министрлігі.
Бұған дейін Шанхай – Алматы жаңа тікелей рейсі туризм мен әріптестікті дамытуға жол ашатыны хабарланған.
