Шымкент қаласының қылмыстық істер жөніндегі ауданаралық сотында бірнеше ай бұрын жаяу жүргіншілерге арналған жолақтан өтіп бара жатқан әйелді көлігімен қағып, мерт еткен ер адамға қатысты іс қаралды, деп хабарлайды Zakon.kz.
Соттың мәліметінше, ер адамға көлiк құралдарын пайдалану қағидаларын бұзу арқылы абайсызда адам өліміне әкеліп соқтыру бабы бойынша айып тағылады.
"Сотта ер адам 2025 жылғы 27 мамырда DAEWOO NEXIA маркалы автокөлігімен Шымкент қаласы, Берді Қожа батыр көшесінде жаяу жүргіншілерге арналған жолақтан өтіп бара жатқан жаяу жүргіншіні қағып, абайсызда кісі өліміне әкеліп соққан жол-көлік оқиғасын жасағаны анықталды. Сотталушының кінәсі өзінің және жәбірленушінің жауаптарымен, сараптамалардың қорытындыларымен, оқиға орнын және көлікті қарап-тексеру хаттамаларымен және басқа да іс бойынша жинақталған дәлелдемелердің жиынтығымен толық дәлелденеді", делінген сот хабарламасында.
Сот Ш-ны ҚК-нің 345-бабының 3-бөлігімен кінәлі деп танып, оған 5 жыл мерзімге көлік құралын басқару құқығынан айыра отырып, 2 жыл 6 ай мерзімге бас бостандығынан айыру жазасын тағайындады. Іс бойынша талап арыз ішінара қанағаттандырылды.
Сот үкімі заңды күшіне енген жоқ.
Бұған дейін адвокат өзіне қатысты шыққан сот үкімін Перизат Қайраттың қалай қабылдағанын айтып берген болатын.
