Денсаулық сақтау министрлігі 16 миллион қазақстандықтың жеке дерегінің таралуына қатысты ресми түсініктеме берді.
Ведомство таратқан мәліметке сүйенсек, деректер әртүрлі көздерден алынуы мүмкін және олардың ішінде 2024 жылғы 1 сәуірге дейін медициналық ұйымдардың ақпараттық жүйелерінен жиналған мәліметтер де болуы ықтимал, деп жазады inbusiness.kz сайты.
– Жарияланған мәліметтерде азаматтардың медициналық деректері жоқ. Дегенмен, кейбір ақпарат медициналық ұйымдардың жүйелерінен алынған болуы мүмкін, – делінген министрліктің ақпарат агенттігіне берген ресми жауабында.
Қазір бұл факті бойынша уәкілетті органдар тексеру жүргізіп жатыр. Осыған байланысты қызметтік ақпаратты жариялауға уақытша шектеу қойылған. Қосымша мәлімет тексеру аяқталған соң жария етіледі.
Министрлік "Жеке деректер және оларды қорғау туралы" заңға сәйкес, медициналық ұйымдар жеке деректерді тек заңды негізде және азаматтардың келісімімен ғана жинауға, өңдеуге және сақтауға міндетті екенін еске салды. Мұндай мәліметтер нақты мақсатқа сай және қажетті көлемде ғана пайдаланылуы тиіс. Ақпаратқа тек уәкілетті қызметкерлердің қол жеткізуіне рұқсат етіледі және ол қауіпсіздік талаптарына сай ұйымдастырылуы керек.
Сонымен қатар, министрлік медициналық ұйымдарда ақпараттық жүйелерді енгізу немесе жаңарту кезінде ақпараттық қауіпсіздікке міндетті түрде баға берілетінін атап өтті. Бағалау нәтижесінде жүйенің қауіпсіздік талаптарына сәйкестігін растайтын сынақ актісі толтырылады.
Айта кетейік, бұған дейін 16 миллион адамның дерегі тарағаны жөнінде болжамдар айтылған еді. Ал Цифрлық даму, инновациялар және аэроғарыш өнеркәсібі министрі Жаслан Мәдиев мемлекеттік дерекқорлар бұзылмағанын мәлімдеді.
