Елімізде риелторлық қызметті реттейтін нақты заң қажет. Себебі, соңғы уақытта делдарға қатысты шағым айтатындар жиілеген.
Бұл туралы Caravan.kz медиа порталы zakon.kz-ке сілтеме жасап хабарлайды.
Тұрғын үйді жалға беру не сату кезінде өзін риелтор деп таныстырып, ақшаны алдын ала алып, ізін суытатын алаяқтар көбейген.
Ақшаны алып, артынан телефонын сөндіріп, ұшты-күйлі жоқ болады. Арзан әрі жайлы пәтер жалдаймын деп, артынан сан соғып қалатындар көбеймесе, азаяр емес, деп жазады qazaqstan.tv.
Көпшілікке танымал Krisha.kz порталы мұндай шағымдардың көбейгенін мойындап отыр. Сайттың пайдаланушыларының қауіпсіздігі мен алаяқтарға тосқауыл қою үшін шаралар қолға алынып келеді дейді.
«Платформадағы компаниялар мен агенттер жеке куәлігін көрсетіп, нақты өзі екенін дәлелдеу керек. Ол үшін арнайы мамандарымыз жұмыс істейді. Тексерілген, сенімді және бізбен келісімшартқа отырған агенттер ғана хабарландыру бере алады. Бұл тұтынушылар үшін қауіпсіздікті қамтамасыз етеді.»Имран Османов, Krisha.kz сату бөлімінің басшысы
Десе де мұндай бақылау амалын асырып, алдайтындарға кедергі болмай отыр. Сан түрлі айла жасайтындарды тоқтату үшін заңгер Роза Сәдуақасова: риелторлық қызметті реттейтін нақты заң қабылдап, талаптарды күшейтетін кез келді» – дейді. Ол үшін бірнеше ұсынысын айта кетті.
Жедел желі қажет деп санаймын. Риелтор мен тұтынушы арасындағы щарттың шаблонын міндетті түрде Үкіметпен бекіту керек. Үшіншіден, бұл қызметті орталықтандыру керек. Төртіншіден, риелторлық қызметті атқарушылардың ортақ тізілімі болуы керек.Роза Сәдуақасова, заңгер
Заңгер алаяқ арбауына түспес үшін риелтордың құжаттарын мұқият тексеруге кеңес береді. Сондай-ақ делдалдық қызметтің шарттары жазылған келісімшартқа қол қоймайынша, ешқандай төлем жасамаған дұрыс. Ал егер алданып қалсаңыз, бірден полицияға және тұтынушылар құқығын қорғау ұйымдарына шағым түсіру қажет.
