Елорда сотында BIZ BIRGEMIZ қорынан ақша жымқырды деп айыпталған Перизат Қайрат пен оның анасының ісі бойынша жарыссөз жүріп жатыр. Жәбірленушілердің бірі сотталушы – Ғайни Алашбаеваға аяушылық білдірді, деп хабарлайды KAZ.NUR.KZ.
Газа секторына деп жылу жинап, BIZ BIRGEMIZ қорына 83 млн теңге аударған жәбірленушілердің бірі Перизат Қайраттың анасы Ғайни Алашбаеваға қатысты прокурорлар ұсынған бұлтартпау шарасымен келіспеді.
"Біз Газа секторындағы отбасылар мен балаларға көмектесу үшін 83 млн теңге жинадық. Қаражат туралы ашық есеп аламын деп үміттендім, бірақ олай болмады. Перизат Қайратпен біртіндеп байланыс жоғалды, көмек көрсетудің орнына үнсіздік пен сылтау айтыла бастады, ал шын мәнінде қайырымдылыққа қатысы жоқ сән-салтанат пен шығындар болды.
Азамат ретінде мен үшін бұл жай ғана ақша мәселесі емес, қайырымдылыққа деген сенімнің әлсірегені. Бұл моральдық қылмыс. Перизат Қайраттың кінәсі дәлелденді деп есептей отырып, прокурорларды қолдап, жазалау шарасына қатысты өтінішті қанағаттандыруды сұраймын.
Ғайни Алашбаеваны ескермегенде, оған қатты жаным ашиды, денсаулығында кінәрат бар екенін білемін, осы орайды ол үйқамаққа алынса деген пікірімді айтқым келеді", — деді жәбірленуші.
Еске сала кетейік, кеше прокурорлар Перизат Қайраттың анасына қатысты бұлтартпау шарасын өзгертіп, оны үйқамақтан күзетпен ұстау шарасына ауыстыруды ұсынған болатын. Бұған дейін Ғайни Алашбаева сотта куәлік беруден бас тартқан.
Айта кетейік, жарыссөздің бірінші күні прокурор Перизат Қайратты 10 жылға, ал анасын 8 жылға бас бостандығынан айыруды сұраған.
Мәтіннен қате тапсаңыз, бізге жазыңыз
