Шымкент қаласында қайтарылған активтер есебінен ерекше оқытуды қажет ететін оқушылар білім алатын колледж жатақханасының құрылысы жүргізіліп жатыр. Бұл туралы қалалық прокуратураға сілтеме жасаған KAZ.NUR.KZ хабарлайды.
Ведомствоның мәліметінше, әлеуметтік нысан сөйлеу және т.б. кемістігі бар 300-ге жуық оқушыны заманауи жайлы жатын орынмен қамтамасыз етуге бағытталған.
Жатақханада оқушыларға қажетті барлық жағдай жасалған медицина кабинеті, спортпен жаттығу, тынығу бөлмелері болады. Қазіргі уақытта ғимараттың қабырғасын өру жұмыстары жүргізілуде.
Жобаны осы жылдың желтоқсан айында аяқтап, қалалық білім басқармасына тапсыру жоспарланған.
"Жобаны жүзеге асыру мерзімі мен құрылыс жұмыстарының сапасы бақылауда. Халықтың өмір сүруін жақсартуға тікелей әсер ететін жайлы жағдай жасау мақсатында қайтарылған активтерді ел игілігіне жұмсау жұмыстары жалғасуда", — делінген хабарламада.
Мәтіннен қате тапсаңыз, бізге жазыңыз
