Қостанай облысында соңғы алты айда түрлі жарақатпен медициналық көмекке жүгінгендердің саны 22 пайызға артқан. Зардап шеккен 1733 адамның арасында балалар мен жасөспірімдер бар. Олардың денін ит қапқан.

Динара Серікжанова, қала тұрғыны:

Бос жүретін ит көп. Анам қаланың басқа бөлігінде тұрады. Ол жақта да жүреді. Қорқасың, әрине. Мектеп жасындағы балаларым бар.

Валерия Федорова, қала тұрғыны:

Велосипедпен жүру қиын. Иттердің жүретін жерін шамамен білемін. Жақындағанда түсіп, жаяу өтемін. Әйтпесе үріп, соңыңнан жүгіреді. Қауып ала ма деп қорқамын.

Биыл жарты жыл ішінде 1433 адамды ит қапқан. Оның 600-ге жуығының иелері бар. Қалғаны «белгісіз» деген санатқа жатқызылады. Мамандардың айтуынша, бұл санатқа иесі бола тұра, бос жүрген жануарлар да жатуы мүмкін. Ал 2023 жылдан бері елімізде иттерді атуға тыйым салынды. Оның орнына санын реттеу үшін ұстап, стирильдеп, чип салу және оңалту туралы өзгеріс енді. Алайда бұл салада әлі шешілмеген мәселе көп.

Талғат Шамшадин, облыстық Ветеринария басқармасы биологиялық қауіпсіздік бөлімінің басшысы:

Мердігерлер бірде бір итті стириль деп, бірде бір итті ұстаған жоқ. Содан біз жарты жылдан артық соттасып, шара жүргізілмеді. Қазіргі кезде қиындық туып жатқаны 4 бағдарламаның әртүрлі болғаны. Бір бағдарламаға қосқан кезде оған бір мердігер шығады. Сол кезде жұмыс тезірек жүреді.

Қаржы министрлігі бір бағытқа біріктіру бюджет заңнамасының нормаларына қайшы келетіндігін хабарлады. Жалпы биыл облыс бойынша 4 бағыт бойынша бюджеттен 130 млн теңге бөлінген. Бұл 3500 итке ғана жетеді. Әзірге алты айда оның 1700-ден астамы толық стирильденіп, қайтадан босатылған.

Мәдина Нағашыбай, тілші:

Біз қазір жануарларды чиптеп, зарарсыздандырғаннан кейін уақытша ұстау, оңалту орталығындамыз. Орталық иесінің айтуынша 300-ден астам ит бар, оның жартысы асылтұқымдылар. Тіпті, арасында осындай қазақ төбеті де бар екен.

Оля Соловьева, оңалту орталығының басшысы:

Көп иелері иттерді чиптемей жауапсыздық танытады. Тіпті, керек емес заттай қараусыз қаңғытып жібереді. Мысалы, мына алабай Киевский ауылынан табылды. Иелері ағашқа байлап тастап кеткен. Біз мұндай ірі тұқымды, қауіп төндіруі мүмкін иттерді өз қаражатымызға орталықта қалдырамыз.

Заңнамаға сәйкес әр азамат үй жануарын чиптеуге міндетті. Олай болмаған жағдайда 15 АЕК есебіндегі айппұл көзделген. Чиптегі бар мәлемет «Таңба» сайтына сақталады. Адамды ит қапқан жағдайда жануарды лезде анықтап, клиникалық жағдайға баға беріп, қауіпті аурулардың алдын алуға мүмкіндік береді.

Мәдина Нағашыбай