Мекеменің өзі Алматы қаласының қарамағына өткізіледі.
Бала құқықтары жөніндегі уәкіл Динара Зәкиева Алматыдағы Бағанашыл балалар үйіндегі жағдайға байланысты пікір білдірді, деп хабарлайды inbusiness.kz сайты.
"Президенттің тапсырмасы бойынша балалар үйінде тұрақты тұратын балалар оқуын жалғастыру үшін Алматы қаласында қалады, ал мекеменің өзі облыстан қала қарамағына өткізіледі. Бүгін балалар үйінің емес, кәмелетке толмағандарды бейімдеу орталығында тұрып жатқан балалар көшірілді. Кәмелетке толмағандарды бейімдеу орталығында өмірлік қиын жағдайға тап болған және облыстың әртүрлі бөліктерінен келген балалар уақытша тұрады. Көктемде балалар мен әкімдік арасындағы кездесудің қорытындысы бойынша, кәмелетке толмағандарды бейімдеу орталығында тұрып жатқан балалар мен мекеменің өзі көшетіні шешілген болатын, бұл ақпаратты мен көктемде жариялағанмын", – деді омбудсмен.
Айтуынша, кеше бұл туралы облыстық білім басқармасының ресми парақшасында әкімдік хабарлады.
"Алайда, Алматы облысының әкімдігі кәмелетке толмағандарды бейімдеу орталығында тұратын балалардың көшуі кезінде қауіпсіздікті қамтамасыз етпеді. Соның салдарынан бүгін жол берілмейтін жағдай орын алды: балалар үйінің түлегі қыз есінен танып қалды, бір баланың аяғы жарақаттанды. Осы жағдай бойынша балалардан келген хабарламадан кейін соңғы апта ішінде бірнеше рет әкімдікке жүгіндім. Алайда жергілікті атқарушы орган хабардар етпей, келісілмеген әрекеттерді жүзеге асырды", – деді Динара Зәкиева.
Барлық жағдай бойынша Президент әкімшілігі тексеру жүргізеді, арнайы топ құрылды.
"Өңірлік уәкіл балалармен бірге. Мен де балаларға бара жатырмын", – деді бала құқықтары жөніндегі уәкіл.
Айта кету керек, бұған дейін Президент тапсырмасымен Бағанашылдағы балалар үйі Қонаевқа көшірілмейтінін жазған едік.
