Жолдарды күтіп ұстауға бөлінетін қаржының жеткіліксіз екені айтылды.
Сенат депутаты Әлішер Нәутиев жолдарды дұрыс пайдалану мен күтіп ұстау мәселесін көтерді, деп хабарлайды inbusiness.kz сайты.
Оның сөзінше, салынған жолдардың бұзылуына жол бермеу үшін шаралар қабылдау қажет.
"Қаржыландырудың негізгі көлемі, яғни 80%-дан астамы жолдарды салуға, жөндеуге және реконструкциялауға бағытталады. Ал жолдарды күтіп ұстауға нормативтік қажеттіліктің төрттен бір бөлігі көлемінде ғана қаражат бөлініп, ол қаржы ұдайы жеткіліксіз болып келеді. Қаражаттың мұндай бөлінісі жылдар бойы сақталып, ол автомобиль жолдарының қызмет көрсету уақытының қысқаруы мен уақытынан бұрын бұзылуына алып келуде", — деді сенатор.
Әлішер Нәутиев жолдардың тез бұзылуына ықпал ететін факторлардың біріне ауыр салмақты көліктердің жалпыға ортақ пайдаланылатын жолдарымен жүруі екенін де айтты.
"Шын мәнінде, бұл салмағы 40 тоннадан асатын карьерлік жүк самосвалдары туралы болып отыр. Бұл ретте, нормативтерге сәйкес жол төсеміне көлік құралының салмағы бір оське орта есеппен 8 тоннадан аспауы тиіс болса да, бұл тәртіп сақталмай отыр. Аталған мәселені жергілікті атқарушы органдар тұрақты түрде көтеріп келеді. Бұл проблеманың оңды шешімінің бір жолы автоматтандырылған өлшеу станцияларын енгізу болуға тиіс", — деді ол.
Депутат Жоғары аудиторлық палатаның ақпаратын негізге алды.
"Жүйедегі қате деректер мен техникалық іркілістерге байланысты кезең кезеңмен жұмыс жасамай қалуда. Бұл ретте станциялардың құны шамамен 2 млрд теңге болса, оларды күтіп ұстауға жұмсалатын қаражат көлемі 617 млн теңгеден асады", — деді Әлішер Нәутиев.
