Жамбыл облысында мәдениет үйі тапшы.

Мысалы, Шақпақата ауылдық округінің өнер ордасы апатты деп танылып, жабылғанына 15 жыл болды. Қазір округке қарасты бес ауылдың мәдениет қызметкерлері, кітапханашылар мен үйірмелер әкімдіктің тар ғимаратында отыр. Мәдениет мәселесі қашан шешіледі?

Шақпақата ауылындағы мәдениет үйінің есігі 15 жыл бұрын жабылған. Іргетасы 1965 жылы қаланған нысан 70 процентке тозып тұр. Өнер ордасының едені отырып, төбесі опырылған. Шатыр жабындысы ұшып, қабырғалар да жарыла бастаған.

Гүлжауһар Сәрсенова, Шақпақата ауылының тұрғыны:

- Бұған дейін де аудан әкіміне ауыл әкіміне өзімнің шағымымды жазған болатынмын. Ол кезде төбесінде қалыңтырлары шайқалып жел тұрған сайын өтіп жатқан тұрғындарға қауіп төндіріп тұрды. Егер өзгеріс болса осы уақытқа дейін мына мәдениет үйі қалыпқа келер еді. Сол өзгеріс болмағаннан кейін осындай жағдай болып тұр.

Шақпақата ауылдық округі құрамына бес елдімекен кіреді. Төрт мыңнан аса адам тұрады. 500-дей жеткіншек түрлі үйірмелерге қатысады. Жергілікті билік ескі әкімдік ғимаратын өнер мектебі ретінде ыңғайластырып берген. Шағын нысанда кітапханашылар мен мәдениет үйінің қызметкерлері де сығылысып отырады.

Ринат Әубәкіров, мәдениет үйінің меңгерушісі:

- Осы мәдениет үйі соғылса халыққа біраз жұмыс көзі табылар еді деп ойлаймын. Штат ашылады. Енді осыны қолға алып соғылса, өте керемет болар еді.

Ескі мәдениет үйі кезінде жеке меншікте болған. Бес жыл бұрын нысанды Жуалы ауданының әкімдігі 12 миллион теңгеге сатып алды. Күрделі жөндеу үшін жобалық сметалық құжаттама әзірлеген.

Тимур Қалдыбаев, Жуалы аудандық сәулет, қала құрылысы бөлімі басшысының м.а.:

- Опораларының несі усиление жасалады. Замена жұмыстары ауыстырылады, крышасын, ішіндегі орындықтың барлығы ескі болғаннан кейін. Едендері де ескі. Жобасын жасадық. Енді бюджеттік өтінім бердік. Енді сол қаржы бөлінген жағдайда біз мемлекеттік конкурс жүргізіп мердігерді анықтап, соның келісім-шарты негізінде жөндеу жұмыстарын жүргіземіз.

Мәдениет үйін күрделі жөндеуге шамамен жарты миллиард теңге қажет. Аудандық әкімдіктің қаражатты облыс бюджетінен күтіп жүргеніне екі жылдан асып кетіпті.

Мерей Бает, Елдар Байділдә