АҚШ-тың Лос-Анджелес қаласындағы шериф департаментінің оқу полигонында жарылыс болып, шерифтің үш көмекшісі қаза тапты, — деп хабарлайды Massaget.kz тілшісі CBS News-ке сілтеме жасап.
Жарылыс 2017 жылы ашылған Biscailuz оқу орталығында, Шығыс Лос-Анджелесте болған.
Тергеуге қатысып жатқан құқық қорғау органдарының жоғары лауазымды өкілдерінің мәліметінше, бейсенбіде Лос-Анджелес округінің шериф департаментінің жарылғыш заттарды залалсыздандыру тобы Санта-Моника қаласындағы гараждан кемі бір граната тауып алған. Бұл граната кейін Biscailuz-дағы оқу орталығына жеткізіліп, сол жерде залалсыздандырылмақ болған. Алайда бүгін ол жарылып кеткен.
Лос-Анджелес шерифі Роберт Луна жұмада өткен баспасөз мәслихатында бұл жағдай туралы егжей-тегжей айтып беруден бас тартты. Ол тергеу жалғасып жатқанын алға тартты. Оның айтуынша, оның мәлімдеме жасауына санаулы минуттар қалғанда ғана оқиға орнын тергеушілерге қауіпсіз деп жариялаған.
"Қазір біз білмейтін дүние көп, білетініміз аз", — деді Луна.
Ол жарылыс кезінде шериф көмекшілерінің нақты немен айналысып жатқаны да әзірге белгісіз екенін атап өтті.
"Біз бұл жағдайдың басынан бастап мән-жайын анықтап, бұл қайғылы оқиғаның нақты неден болғанын білуге тырысамыз", — деді ол.
Лунаның айтуынша, бұл оқиға 1857 жылдан бері департамент тарихындағы адам шығыны бойынша ең ауыр трагедия болған. Ал Лос-Анджелес округі 1850 жылы құрылған.
АҚШ бас прокуроры Памела Бонди Х әлеуметтік желісіндегі парақшасында бұл оқиға орнында федералды агенттер де болғанын мәлімдеді.
Қызықты жаңалықтар мен видеоларды көру үшін TikTok арнамызға жазылыңыз!
