Бір айдың ішінде цифрлық трансформация карталарына қатысты жұмыс аяқталуға тиіс. Премьер-министр Олжас Бектенов Цифрландыру мәселелері жөніндегі комиссияның отырысында осыны тапсырды. Айта кетейік, қазір барлық мемлекеттік органдар бір уақытта цифрлық трансформация карталарын әзірлеп жатыр. Басты назар ескірген процедураларды қайта өңдеуге, деректерді цифрландыруға, сондай-ақ, E-Otinish, 109 және әлеуметтік желілер арқылы келіп түскен азаматтардың сұраныстарын қайта өңдеуге аударылған. Бұдан бөлек Үкімет басшысы іске қосылған суперкомпьютерді қоса алғанда, құрылып жатқан ұлттық инфрақұрылым мемлекеттік органдардың қызметіне жасанды интеллект енгізу жөніндегі жұмысты жандандыра түсетінін атап өтті. Отырыс барысында QazTech платформасы базасында салалар мен мемлекеттік органдардың жұмысын одан әрі цифрлық трансформациялау мәселесі де қаралды.
Дархан Әбдуахит
