Атырауда мұнай компаниясында бөлім басшысы болып қызмет еткен 46 жастағы әйелдің өліміне қатысты іс қылмыстық істер жөніндегі мамандандырылған ауданаралық сотқа жолданды, деп хабарлайды Ақжайық.
Басылымның хабарлауынша, 2025 жылы сәуірде болған адам өліміне күдікті ретінде танылған 38 жастағы ер адамға Қылмыстық кодекстің бірнеше бабы бойынша айып тағылып отыр.
Олар:
- Қылмыстық кодекстің 190-бабы 1-бөлімі — алаяқтық;
- 120-баптың 2-бөлімі, 2-тармағы — аса қатыгездікпен зорлау;
- 188-баптың 3-бөлімі — ірі көлемде ұрлық жасау;
- 200-баптың 1-бөлімі — автокөлікті заңсыз иемдену;
- 99-баптың 2-бөлімі, 4, 5, 8 және 10-тармақшалары — жүкті әйелді өлтіру, аса қатыгездікпен, пайда мақсатында, зорлық-зомбылықпен және басқа да қылмыстармен бірге жасалған.
Сот процесі жабық режимде өтеді.
Басылымның қаладағы "Француз кварталы" тұрғындарына сілтеме жасап хабарлауынша, күдікті марқұм Бибігүл Шпанова тұратын жерде өзін сенімді сантехник ретінде таныстырып, әсіресе әйелдердің сеніміне тез кіріп, алдын ала ақша алып, кейде жоғалып кететін болған.
Тергеу мәліметтері бойынша, күдікті Ж. көптен бері тұрғын үй кешенінде жұмыс істеп, сол жерде тұратын адамдармен, соның ішінде Шпановаға да таныс болған. Әйел оған жөндеу мәселесі бойынша жүгініп, кейін оның алаяқтық жасағанына күдіктеніп, ақшасын қайтаруды талап еткен. Трагедия болған күні ол оның үйіне келіп, Бибігүл есікті ашқан бойда шабуыл жасаған. Ер адам оған көп пышақ жарақатын салып, одан соң зорлаған. Кейін пәтерден шығып, есікті құлыптап, құрбанының телефоны мен құнды заттарын алып кеткен. Әйелдің көлігін ұрлап, біраздан кейін жол апатына ұшырады. Кейін жаяу жүріп үйлердің ауласына оралады, бұл бейнекамераға түсіп қалған. Кейін Маңғыстау облысында ұсталды, жанында марқұмға тиесілі ұрланған заттар табылды.
Еске сала кетейік, NCOC мұнай компаниясының менеджері, 46 жастағы Бибигүл Шпанованың денесі сәуір айында өз пәтерінен табылған еді.
Мәтіннен қате тапсаңыз, бізге жазыңыз
