Үйінің маңайынан тұрғын үй кешені салына бастағалы әнші Асхат Тарғынның мазасы қашқан. Өйткені күніне әрлі-берлі жүз рет өтетін жүк көлігі көтерген шаңнан көршілерімен қоса тұншығып отыр, деп хабарлайды КТК арнасы.
Телеарнаның хабарлауынша, осыдан екі жыл бұрын өнер жұлдызы Алматы іргесіндегі Бесағаш ауылына үй салып, қоныс аударған. Қаланың шуынан қашып келгенде бұл жақта да тұрғын үй кешенінің құрылысы басталған. Әнші "шаңнан көз ашпай отырмыз" деп құрылысқа жауаптыларға қандай да бір шара қолдануды сұрайды. Ал құрылыс компаниясының өкілдері сәл шыдаса, жолға асфальт төсеп береміз деп уәде берген.
"Компания үй салғаннан бері үлкен бір проблема болып тұр. Көшемізді бүлдірді. Шаң, үйге кіріп-шыға алмаймыз, тереземізді аша алмаймыз. Көріп тұрсыздар, жүк көлігінен шыққан шаңды. Күніне осы жерден 90 КамАЗ өтеді, мазамыз қашты. Таңғы жетіден басталады, ұйқы жоқ. Алдында сенбі, жексенбіде де жұмыс істеді", — дейді өнер иесі.
Телеарна тілшісінің хабарлауынша, құрылыстың кесірінен мұндағы үйлердің сырты опырылып жатқан көрінеді.
Мәселен Гүлзира Арықбай есімді тұрғын үйінің қабырғасына сызат түсіп, едені жарылғанын айтады.
"Біз осында көшіп келгенімізге алты ай болды. Жаңадан түскен үй болған. Құрылыстың кесірінен керегелеріміз ашылып, дүрсілінен балаларым шошып, үйде отырудан қорқып. сыртқа қашады. Еденімізге дейін дейін ашылып, керегелеріміз де ашылып, топырақ жұтып жатырмыз", — дейді Гүлзира Арықбай.
Тағы бір тұрғын үйінің терезелері қирап жатқанын айтты.
"Күніне, жоқ дегенде, 2.5-3 баллға сілкиді. Шаңдатып күні-түні, тіпті түнгі сағат үште де жұмыс істейді. Ескертіп айтсаң, "қайда барсаң, сонда бар" деп шығарып салады", — дейді Айгүл Қасенова есімді тұрғын.
Тұрғындардың сөзінше, кешен құрылысына бір емес, бірнеше компания жауапты. Солардың бірінің айтуынша, түнде жасалынатын құрылысқа мердігер компания жауапты. Ал жол мәселесін жақын арада шешеміз отыр.
"Біз бұл жолды қалпына келтіру мәселесін толық қолға аламыз. Су құбырларын да тартуды өз жауапкершілігімізге аламыз. Жолға талапқа сай, ыстық асфальт төсейміз және құрылыс кезінде оны күтіп ұстаймыз. Келісімшарт бойынша құрылысты 2027 жылдың ортасында аяқтауымыз қажет", — деді құрылыс компаниясының өкілі Ермек Саурықбаев.
Дегенмен құрылыс компаниясы мұнда не салынып жатқанын ашып айтпаған.
Ал әкімдіктегілер құрылысқа рұқсат бар, ғимараттар арасында қашықтық пен барлық санитария ережелер сақталған дейді. Дегенмен тұрғындар бүлінген үйлерінің шығынын кімнің өтеп беретінін түсінбей дал. Олар жолдың жыры мен түнімен тоқтатамайтын құрылысты әкімдік қадағаласа екен дейді.
Дереккөз: КТК
Мәтіннен қате тапсаңыз, бізге жазыңыз
