Тағы бір жаңа туынды – «Байдың баласы» фильмі көрерменге жол тартты. Отандық кино «Tiger Films» продюсерлік компаниясының қолдауымен түсірілген. Туындының режиссёрі – Абдуасаид Шайхисламұлы. Астарлы әзіл, қағытпа қалжыңға толы фильмде отбасы құндылықтары мен шым-шытырыққа толы оқиғалар баяндалады.
Фильм сюжетіне ауқатты отбасында дүниеге келіп, еркелеп өскен 13 жастағы Арман мен ата-анасының қарым-қатынасы арқау болады. Арманның әкесі Әділ – табысты кәсіпкер. Ол үнемі баласының тәрбиесіне көңілі толмай жүреді. Сөйтіп перзентінің тәртібін түзеу мақсатында әлеуметтік жағдайы төмен, жатақханада күн көріп жүрген отбасыға бірнеше күнге тастап кетеді. Осы кезде еркетотай Арманның өмірге деген көзқарасы күрт өзгереді.
Ақболат Өтебай, актёр:
Жастарға, кішкентай балаларға ой салатын фильм деп ойлаймын. Өйткені қазір балалардың арасында буллинг көп. Көкірегі көтеріліп кеткен, әке-шешесінің қолдауына сеніп қалған ұл-қыздардың эгосына кеңес айтатын фильм болады деп ойлаймын.
Фильмде ауқатты және қарапайым отбасындағы күнделікті күйбең тіршілік айқын көрінеді. Заманауи әзілмен көмкерілген фильм жастарды адами құндылықтарды ардақтауға, еңбекке араласып, жанұя бірлігін сақтауға баулиды, дейді шығармашылық топ.
Сабира Ақатай, актриса:
Кез келген жағдайды позитивпен алып шығатын, өмірінде болып жатқан жағдайларға өкінбейтін, өзін бақытты сезінетін ананың әрі жардың рөлін ойнаймын. Жоқшылықта да жолдасыңмен бірге өсу, оны қолдау, қандай жағдай болмасын және кез келген дүниенің жағымды тұсын көре білу.
«Байдың баласы» – жәй ғана комедия емес. Қазіргі замандағы бала тәрбиесінің өзекті мәселелерін қозғайтын, қоғамға терең ой салатын фильм. Кинокартина баршылық пен жоқшылықтың арасындағы көзқарас алшақтығын көрсетіп, сол арқылы әр адамның өз өміріндегі бақытты сәттерді бағалай білуін ұғындырады, дейді фильм авторлары.
Айдана Қуантхан
