Оңай олжаға кенелеміз деп опық жеген жұрт бүгін облыстық прокуратураның алдына жиналды.
Қызылорда облысында жүзге жуық адам алтын саудасымен айналысатын әйелге алданып қалдық деп дабыл қақты. 34 жастағы келіншек тұрғындарды бағалы бұйымдар бизнесіне инвестиция құйсаңдар, мол табысқа кенелесіңдер деп сендірген. Ақырында жұрт сан соғып, миллиондап берген ақшаларын қайтара алмай қалған, деп хабарлайды 31-арнаның "Информбюро" ақпараттық бағдарламасы.
Оңай олжаға кенелеміз деп опық жеген жұрт облыстық прокуратураның алдына жиналды. Айтуларынша, былтыр Ақжар ауылында тұратын келіншек тұрғындарды алтын саудасына қаржы салуға шақырған. Яғни "инвестор болып, пайда табасыңдар" деп қызықтырып, үгіт жүргізген екен.
Кәсіпке азаматтар 2 мен 25 миллион теңге аралығында ақша құйған. Түптеп келгенде, басында тұрғандар үстемақысын алып, соңындағылар бармақ шайнап қалған, дейді салымшылар. "Сан соғып қалғанымызға көзіміз жетті", деген халық енді құзырлы органдардан көмек сұрайды.
"Бірінші ГОВД-ға, екінші прокуратураға жаздық. Үшінші ДЭР-ге де арыз бердік. Ұжымдық та, жеке де арыздар жолданды. Бірақ ешқандай жауап жоқ, ешкіммен беттестірген де жоқ. Жағдай жауапсыз қалып отыр", – деді Қызылорда қаласының тұрғыны Айнұр Шабдатқызы.
Оқи отырыңыз: Ержан Бабақұмаров серіктестіктен қысым жасауға көшу туралы: АҚШ Қытаймен, ЕО және Ресеймен қарым-қатынасты қалай қайта құруда
Халықтан қыруар қаражат жинаған келіншекпен байланысу мүмкін болмады. Ал Экономикалық тергеу департаментіндегілер "қаржы пирамидасын құру" бабы бойынша іс қозғалғанын хабарлады.
"Қызылорда облысының азаматтарының арыздары негізінде 15 мамырда сотқа дейінгі тергеп-тексеру басталды. Іс бойынша арызданушылар саны 30-дан асты. Оларға келтірілген залал мөлшері 70 миллион теңгеден асады", – деді Қызылорда облыстық экономикалық тергеу департаментінің басқарма басшысы Жандос Кенжебаев.
Алдандық деп арыз жазып жатқандар қатары әлі де көбеюі мүмкін. Құзырлы орган өкілдері күдіктінің кінәсі дәлелденсе, жазадан құтылмайды деп сендірді. Олар "талайды тақырға отырғызған қаржы пирамидаларының атышулы істері көпшілікке сабақ болмады" деп қынжылады.
