Астанада қайырымдылық қордың бұрынғы жетекшісі, волонтёр Перизат Қайрат пен оның анасы Ғайни Алашбаеваға қатысты сот отырысында бірқатар куәгерден жауап алынды. Куәгер Әділхан Мусиннің сөзіне сенсек, ол сотталушы Перизат Қайратпен бірнеше рет кездесіп, қор қаржысын жеке кәсіпкерліктердің шоты арқылы қолма-қол ақшаға айналдырған, деп хабарлайды Kazinform.
"Қанша рет болғаны, нақты есімде жоқ, өйткені кездесу сәуір-мамыр айларында өтті. Бірақ кейін ақшаны мен тапсырдым, шатаспасам, үш кездесу болған сияқты. Дәл барлық соманы атай алмаймын, шамамен, бір жеке кәсіпкер орта есеппен 70 миллион теңге алған. Ұмытпасам, 12-13 жеке кәсіпкер болды. Менің түсінуімше, егер жеке кәсіпкер белгілі бір сомаға шарт жасасса, ол бұл соманы бір реттік аударыммен ала алған. Ал егер шартта қандай да бір ескерту болса, ол кезде екі траншпен жібере алған. Бірақ түсінгенім жеке кәсіпкерлердің дені ақшаны бір реттік аударыммен алған", — деді Әділхан Мусин сотта.
Куәгердің айтуынша, қолма-қол ақшаны күдікті Перизат Қайраттың өзі алып жүрген.
"Ақшаны Перизаттың өзі алып жүрді. Ыңғайлы болу үшін біз ақшаны сөмкелерге салатынбыз. Себебі банк бізге ақшаны буылған күйінде беретін. Оларды сөмкеге салған ыңғайлырақ еді. Бұл сөмкелер кейін өзіне жеке табысталып, көлікке жүктелетін", — дейді ол.
Прокурор куәгерден ақша қандай сөмкеге салынғанын нақтылады.
"Кәдімгі Қытайда жасалған тор сөмкелер", — деп қысқа қайырды Мусин.
Сондай-ақ куәгер қордың шамамен 210 миллион теңгесі қолма-қол ақшаға айналдырылғанын айтты.
Естеріңізге сала кетейік, 2024 жылғы 14 қарашада қайырымдылық қорының құрылтайшысы Перизат Қайратқа қатысты тергеу жүргізіліп жатқаны белгілі болды.
Қаржылық мониторинг агенттігі ол көктемгі су тасқынынан зардап шеккен азаматтарға көмектесу үшін жиналған 1,5 млрд теңгеден астам қаражатты жымқырды деген күдікке ілінгенін мәлімдеді.
Сол кезде ҚМА өкілдері қайырымдылық үшін жіберілген қаражаттың негізгі бөлігі қымбат сән бұйымдары мен жылжымайтын мүлік сатып алуға жұмсалғанын хабарлаған еді.
Биылғы наурызда Перизат Қайрат басқарған "Biz birgemiz Qazaqstan 2030" қоғамдық бірлестігі мәжбүрлі түрде таратылатыны хабарланды.
9 шілдеде Астанада Перизат Қайрат пен оның анасына қатысты ісі бойынша сот процесі басталды. Перизат Қайрат пен анасына қатысты сот ішінара жабық өтеді.
Мәтіннен қате тапсаңыз, бізге жазыңыз
