АҚШ басшысы бұл түпкілікті шешім емес екенін айтты.
АҚШ президенті Дональд Трамп 150-ден аса елден келетін тауарларға 10-15% мөлшерінде бірыңғай кедендік баж салығын енгізуді жоспарлап отыр, деп хабарлайды inbusiness.kz сайты.
Ақ үй басшысы Real America’s Voice телеарнасына берген сұхбатында кейбір елдерге қатысты тарифтер бойынша шешім қабылдағанын мәлімдеді.
"Біз қалған 150-ден астам елге бірыңғай тариф енгіземіз. Ол шамамен 10-15% деңгейінде болады", – деді Трамп.
Дегенмен АҚШ басшысы бұл түпкілікті шешім емес екенін баса айтты.
Президенттің сөзінше, АҚШ Үндістан және Еуроодақпен сауда келісімдеріне қол жеткізуге дайын. Трамп бұрын Еуропаның АҚШ-қа сауда жағынан зиян келтіріп келгенін, алайда қазір олардың мәмілеге келуге ұмтылып жатқанын айтты.
Трамп Канадамен сауда келісімін жасасу мүмкіндігіне қатысты сұраққа да жауап берді.
"Канадалықтар бізді қатты ренжітті, олар америкалық фермерлерге 400% баж салығын салды", – деді АҚШ президенті.
1 тамызда Дональд Трамп енгізген кедендік баж салығы күшіне енуі тиіс. Қазір көптеген мемлекет Вашингтонмен сауда келісімдерін жасауға басымдық беріп отыр.
