Франция мен Италия НАТО аясында Украинаға арналған америкалық қару-жарақ жеткізілімдерін қаржыландыру бастамасына қатыспайтынын мәлімдеді.
Бірқатар батыс басылымы хабарлағандай, НАТО-ға мүше үш еуропалық мемлекет, яғни Франция, Италия және Чехия Украинаға арналған АҚШ қаруын төлеу бастамасына қатысудан бас тартты, деп жазады inbusiness.kz сайты dw.com порталына сілтеме жасап.
Politico басылымының жазуынша, Франция Президенті Эммануэль Макрон еуропалық қорғаныс өнеркәсібін ішкі сатып алулар арқылы дамыту керек деп ұзақ уақыттан бері айтып келеді.
Сонымен қатар, Франция үкіметі бюджет тапшылығын еңсеруге тырысып жатқандықтан, қорғаныс шығындарын арттыруда қиындықтар көріп отыр.
Италия да осындай бюджеттік себептермен бастамаға қосылғысы келмейді. La Stampa газетіне пікір білдірген Италия Қорғаныс министрлігіндегі дереккөздер:
"Италияда қару сатып алуға бюджет мүмкіндігі жоқ. АҚШ қаруын сатып алу бұл жерде мүлде қарастырылмаған", – деп мәлімдеді.
Чехия Премьер-министрі Пётр Фиала өз елінің бұл бағдарламаға қатыспайтынын ашық айтты.
"Чех Республикасы Украинаға қолдауды басқа бағыттар бойынша жалғастырады. Атап айтқанда, біз чехиялық оқ-дәрі бастамасына басымдық береміз. Сондықтан бұл кезеңде біз америкалық қару-жарақ сатып алу бағдарламасына қатысуды қарастырмаймыз", – деді ол Publico басылымына берген сұхбатында.
