Ұлытауда жыл соңына дейін мал өсіретін 30-дан астам ірі шаруа қожалығы құрылады, деп хабарлайды 24KZ. Жоба «Отбасылық ферма» деп аталады. Елде бұрын-соңды болмаған бастама шағын шаруашылықтарды біріктіру арқылы жүзеге асырылмақ. Оған Жаңаарқа ауданы мен Жезқазғаннан шаруа қожалықтары мен екі өндірістік кооператив қатысуға ниет білдірген.
Болашақ фермаларға, тұрғын үй мен қора-жайлар салуға, сумен және электр энергиясымен қамтуға облыс қазынасынан 1,2 миллиард теңге бөлінді. Бұл қаржы шаруашылықтарға 3,5%-пен 10 жылға беріледі. Шаруалар несиені екі жылдан соң ғана қайтара бастайды.
Мұқағали Рамазан, Ауыл шаруашылығы басқармасы басшысының м.а.:
- Бағдарламаның басты мақсаты – шаруа қожалықтарын біріктіріп, үлкен бір тәжірибелі өндірістік кооперативті көрсету. Біріктіруге, жұмыс жасауға болады және ол оңай деп көрсеткіміз келіп отыр. Себебі, мысалы, бұл бағдарлама аясында қысқа мал азығын дайындайтын бөлек бригада болады. Біреуі қоймен, біреуі сиырмен қамтамасыз етеді. Осындай бір айналымдағы өндірістік кооператив болады.
