Жапония Үкіметі Семейдегі ядролық сынақтар салдарымен күресу үшін өтеусіз грант бөледі. Бұл бастама медициналық көмек көрсету сапасын арттыруға сеп болмақ. Бұл жайында бүгін Премьер-министр Олжас Бектенов пен Хирошима префектурасының губернаторы Хидехико Юзакимен кездесу барысында айтылды.
Жалпы Жапония Қазақстанның ядролық қарусыз әлем құру жолындағы рөлін жоғары бағалап, бұл бағыттағы әріптестікті жалғастыруға мүдделі. Әңгімелесу барысында «Хирошима – Семей» бастамасын жалғастыру, Mayors for Peace қозғалысы аясындағы білім алмасу және Абай облысы мен Хирошима арасындағы байланысты тереңдету мәселелері қаралды. Тағы тараптар сауда-экономикалық ынтымақтастықты арттыру, гуманитарлық бастамалар мен жаһандық қауіпсіздікті нығайту жолында бірлесе күш жұмылдыру жайын да талқылады.
