Kaspi Bank-тің заңгері Айдар Кісенбаев Перизат Қайрат ісіне қатысты сот отырысында 2025 жылы 16 шілдеде аталған банктің "Biz Birgemiz Qazaqstan 2030" қоғамдық қорына қомақты сома аударғанын мәлімдеді, деп хабарлайды Zakon.kz.
Кісенбаевтің айтуынша, 2024 жылдың 5 сәуірінде қор басшысы банкке 120 млн теңге бөлу туралы ресми хат жолдаған. Ал 8 сәуірде екінші хат түсіп, қосымша 500 млн теңге сұралған. Банк барлығы 620 млн теңгені қордың шотына аударған.
1 шілдеде "Biz Birgemiz Qazaqstan 2030" қоры банкке алғыс хат жолдап, 30 маусымға дейінгі қаржы есебін қоса ұсынған. Құжатта көрсетілгендей, 424 146 296 теңге қайықтар, генераторлар мен жөргектер сатып алуға жұмсалған. Қалған қаражат азық-түлік пен басқа да қажеттіліктерге бөлінгені айтылады.
"Алайда кейін анықталғандай, бұл есеп шындыққа жанаспайтын болып шықты. Қазіргі таңда бұл қаражаттың ұйым басшысы тарапынан жымқырылғаны белгілі болды. Салдарынан Kaspi Bank-ке 620 миллион теңге көлемінде залал келді", – деді ол.
Заңгер банкке қор атауы сенім ұялатқанын айтты.
"Сол кезде аты дүркіреп тұрды. Kaspi Bank басшылығы осы қорға сенім білдіру туралы шешім қабылдады. Арты бұлай болатынын ешкім болжамады. Біз одан қор туралы барлық мәліметтерді сұрап алдыртып, тексердік. Бірақ ол кезде қорға қатысты қандай да бір қылмыстық фактілер тіркелмеген еді. Оның үстіне Jusan Bank 300 млн теңге аударғаны туралы ақпарат тарады. Біз де осы үлгіні негізге алдық”, – деді ол.
Бұған дейін Қаржылық мониторингі агенттігі Перизат Қайрат пен оның анасы Ғайни Алашбаеваға қатысты алаяқтық және қылмыстық жолмен алынған ақша мен мүлікті заңдастыру фактілері бойынша сотқа дейінгі тергеп-тексерудің аяқталғанын жариялаған. 2025 жылғы 19 наурызда тараптар 109 томнан тұратын қылмыстық іс материалдарымен танысуға кірісті.
Бұған дейін хабарланғандай, залал сомасы 3,5 млрд теңгені құрады.
Ұрланған қаражатқа сатып алынған 865 млн теңге көлеміндегі мүлікке тыйым салынды.
Қылмыстық іс айыптау актісін бекіту және сотқа жолдау үшін Бас прокуратураға берілді.
