Шымкенттік боксшы Ибрагим Ирисматовтың қазасына байланысты Қазақстанның бокстан 22 жасқа дейінгі (U-22) құрамасының бас бапкері, Олимпиада чемпионы Бақыт Сәрсекбаев пікір білдірді, деп хабарлайды Zakon.kz.
Бұған дейін әлеуметтік желіде "шымкенттік боксшы Ыстықкөлде Қазақстан құрамасының оқу-жаттығу жиынында жүріп қаза тапты" деген ақпарат тараған еді. Бақыт Сәрсекбаев бұл мәліметті жоққа шығарды.
"Ресми түрде мәлімдеймін: Ибрагим Ирисматов ұлттық құраманың сапында жоқ. Ол Ыстықкөлге жеке бапкерінің шақыруымен, өз қаражатына демалуға барған. Оқыс оқиға жалпыға ортақ жағажайда болған. Ол шомылып жүріп, біздің спортшыларды – жерлестерін көріп, солармен бірге суға түскен. Құрамадағы жігіттер оны құтқаруға тырысты, бірақ біз команда құрамына кірмейтін адамдар үшін жауап бере алмаймыз. Маусым басында біз спортшылардың тізімін Спортты дамыту дирекциясы мен федерацияға тапсырамыз және сол спортшылар үшін ғана жауаптымыз. Ал бұл жағдайда бапкер спортшыны демалысқа әкелген", — деді Бақыт Сәрсекбаев caravan.kz сайтына берген түсініктемесінде.
Трагедиядан кейін Бақыт Сәрсекбаев және бүкіл команда Ирисматовтың жеке бапкеріне көңіл айтқан.
"Бұл өте ауыр жағдай. Бірақ дәл қазір, ата-анасына да, бапкеріне де қиын сәтте, жалған ақпарат таратып, жағдайды одан әрі қиындатудың қажеті жоқ", — дейді бұл ретте қынжылыс білдірген Сәрсекбаев.
Шымкент қалалық спорт басқармасы да Ирисматовтың расымен қалалық кәсіпқой бокс клубында болғанын, бірақ Ыстықкөлдегі U-22 Қазақстан құрамасының ресми жиынына қатыспағанын ресми түрде растады.
Бұған дейін шомылу маусымы басталғалы Қапшағайда 6 адамның суға батқанын жазғанбыз.
